Chief Minister-in sum a âtchilh - Zodintluanga

Congress Legislature Party (CLP) leader Zodin­tluanga, Mizoram Pradesh Congress Committee (MPCC) treasurer ni bawk chuan, chief minister Zoram­thanga'n sum hlir a sawi ṭhin tih sawiin, chu chu mipui rilru sûkthlêk tichhetu a nih theih avangin mipui tan a him loh thu a sawi.

Nimina Lunglei Dis­trict Congress Com­­mittee (LDCC)-in Lungleia Cong­ress Bha­van-a conference a hmanpuinaah thu sawiin Zodintluanga chuan,  "Sum harsatna vanga kan ram a rûm mek laiin ram hruaitu lú ber chuan sum tam thu leh awlsam tur thu hlir a sawi avangin, mipui moral a tihchhiat a hlauhawm ta tak zet a, kan tu leh fate rilru sûkthlêk a him theih nan kan CM thusawi hi ngaihthlaktir tawh lo ila kan him ber ang," a ti. 

Zodintluanga chuan, tun dinhmunah Reserved Bank of India (RBI) aṭanga sum pûk chawpin Mizoram sorkar a kal thei ṭâwk ṭâwk chauh tawh tih sawiin, "MNF hian kan ram an kaihruai hlei thei lo tih a lang chiang tawh. Mizoram mipuite sum âtchilhna leh sum bâwiha kan luh a hlauhawm a, chhungkaw pa berin sum ringawt a âtchilh a, sum ât­chilh turin a fate a fuih reng chuan sum bâwihah an lut dawn a ni," a ti. Chief Minister chu sum ringawt buaipuia sawi lo turin a chah a ni.

MPCC Treasurer chuan, MNF sorkar chu state páwn hnam dangin an hlau lo hle tih sawiin, "September 7, 2019 khan India rama Hindu lal ram din tumtu pawl RSS mi leh sa 140 lai kan CM bangla kawtah pungkhawmin Jana Gana Mana an sa a, Vande Mataram, Bharat Mataki- Jay tiin an rual ngam a ni," a ti a; chutiang thil chu tun hmain Mizorama la thleng ngai lo, Lal Thanhawla chief minister a nih laia Central-a BJP sorkar lai pawhin a thleng ngai lo tih a sawi.

CM Zoramthanga hnuaiah India rama hnam dangte'n Mizo hnam leh Kristiante an hlau lo ṭhin nia sawiin Zodintluanga chuan, "He thil thleng hi CM leh sorkar tana thil zahthlak, Mizoram tihmualpho tumna a ni a, MNF an zahlohna leh sorkar an hmuhsitna an tilang a ni. MNF sorkarna hnuaiah ram leh hnam a him lohzia a lantir bawk. 'Keini ram leh hnam chhan ngam kan awm e' tiin, ram leh hnam chhan turin Congress kan awm a ni," a ti.

CLP Leader chuan, MNF sorkarin an tlangaupui ber SEDP-ah cheng nuai thum sem tur Mizoram budget-ah hmuh tur a awm loh thu a sawi bawk. LDCC conference-ah hian an inthlang nghal a; LDCC president atan C Lalhmingliana, vice president atan Lalchhawnzauva leh treasurer atan R Lalnunthara te chuhtu awm loin an tling a ni.