Maintenance of Household Registers Bill Governor-in President hnenah a thawn

Governor Prof. Jagdish Mukhi chuan March 18, 2019-a Assembly session-a pass tawh 'The Mizoram Maintenance of Household Registers Bill, 2019' chu President Ramnath Kovind hnenah a thawn. Bill hi khua leh tui dik takte chhinchhiahna tur a ni.

The Mizoram Maintenance of Household Registers Bill, 2019 hi Governor pawmpui (assent) tura thawn a nih hnuah Governor-in a la pawmpui lo a, a la pawm loh chhan Mizoram sorkarah a hriattir lo. Bill kaihhnawih department, GAD erawh chuan Governor Secretary hnen aṭangin Governor hian dan lama mithiamte a ráwn mek tih an dawng thung.

Assembly speaker Lalrinliana Sailo chuan, Governor-in thu leh hla a neih har êm avangin, tun hnaia Aizawl a rawn tlawh ṭum khan Bill chungchang a zawtfiah a; Governor chuan Speaker hnenah hian, Bill chu President hnenah a thawn thu hrilhin, "Bill hi a serious avangin thutlukna chu Central siam turin ka dah," tiin a sawi a ni.

Speaker sawi danin, Governor hian Assembly House-a bill pass, pawmpui tura state sorkarin a thawnah kawng chi liin thutlukna a siam thei. Chu'ngte chu - pawmpui (assent), pawmpuina pek loh (withhold assent), President pawmpui tura dah leh, state sorkara ngaihtuah ṭhat leh tura thawn a ni.

Vanglaini palai zawhna chhangin Assembly secretary SR Zokhuma chuan, an hriat theih chinah tun hmain bill pakhat chu Governor-in President hnenah a thawn thu a sawi a, "Bill hi pawm zui a ni lo," a ti a; tun ṭum hi Mizoram Assembly-a bill pass, President hnena thawn a nih ṭum hnihna a nih thu a sawi.