Sorkarin Zokhawtharah IR a dah luh belh Zokhawtharin IR sipai dah belh an sawisel

Mizoram sorkar chuan September 18, Nilai­ni khan Zokhawtharah IR (Indian Reserved) police 60 vel an dah belh. Zokhawthar VC & All NGO Coordination Committee erawh chuan, an khuaa IR police 60 vel rálthuam famkim nena dah luh belh chu an duh loh thu an tarang.

Mizoram Police hotute chuan Vanglaini palai zawhna chhangin, Zokhawtharah venhimna thilah police indah belh a ṭul hrim hrim avangin an indah belh tih an sawi a; chutih rualin, Zokhawthar kaltlanga Myanmar nena insumdawn tawnna chungchangah neuh neuh a tam thu leh, buaina pawh inmung anga ngaih theiha thil a kal thu an sawi bawk.

Thu dawn danin, Zokhawthar boruak chung­chang hi nimin khan Champhaiah district bawrhsap hoin sawiho a ni a, thuthar erawh a awm lo a, police dah belhte pawh lak chhuah an la ni lo. Meeting-ah hian sorkar official te, sumdawng pawlte leh Zokhawthar V/C president-te tel tura hriattir an ni. 

Zokhawthar VC & All NGO chuan, 8th Bn. Assam Rifles hmalakna avangin Zokhawthar kaltlanga Myanmar nena insumdawn tawnna bungraw ṭhenkhat chu September 7, 2019  aṭangin kalphung pangngai angin kaltlangtir phal a ni lo tih sawiin, "Khawtlang hruaitute leh AR post commander Maj. Mak pawh vawiduailo biak a ni a, mipui eizawnna a nih hria a, ruahmanna ṭha zawk siam turin ngen fo a ni a, a thuràwn angin district thuneitute pawh biak an ni a, boruak ṭha beiseia ngaihchan mek a ni," an ti.

Zokhawthar VC & All NGO tarlan danin, September 18, 2019 chhun dar 12-ah Champhai SP leh Dy. DSP leh Champhai Police Station OC-te chu Khawzawla IR police section hnih telin (mi 60 vel) chu ralthuam famkim nen Zokhawthar an luhchilh a ni. Champhai SP chuan khawtlang hruaitute chu Zokhawthar Police Outpost-ah ko khawmin, Zokhawthar sipai camp luhchhuah leh buaina siam tuma mipui inbuatsaih leh buaina thleng mai tura boruak inmun mek thunun tura Zokhawthara kal an nih thu a hrilh.

Zokhawthar chuan, Zokhawthar khawtlangin sipai thu awihin, bungraw lak luh leh thawn chhuah an ti ngai lo a, phal lohna hmun aṭangin engmah an ti ngai lo nia sawiin, "Ṭha taka inbiain harsatna kan sawiho ṭhin. Tunah pawh an phal lohna hmun aṭangin leh an phal loh bungrua lak luh a ni lo a, lak luh tumna a awm hek lo," an ti.

Sorkar thuneitute chu thu dik lo hrilhtu an awm nia an ngaih thu sawiin, VC & NGO-te chuan, "False information pe a, Zokhawthar mipui nungchang ang lo tak titlangthang a, rál­thuam famkim nena luhchilh kan ni hi pawi kan ti hle," an ti a; sorkara report dik lo petu zawng chhuak a, action la turin thuneitute an phût a ni.