KHAWTHLIR

Sangau-II Village Organization hnuaia self help group (SHG) 13-te chuan nimin khan an khaw chhung tihfai hnatlang an huaihawt a, SHG member 50 chuang an thawk chhuak. Hnatlangte hian khaw chhunga hnimte an sâm fai bakah khawlai bawlh­hlawhte an phiat fai a; nimin vêk khan Sangau damdawi-in (primary health centre)-ah ṭhut­thleng (bench) pali an pe bawk.

Mizoram sorkar leh Wildlife Conservation Society chuan nimin khan ‘Wildlife law enforcement and countering wildlife trafficking’ tih thupui hmangin Forest Research Centre for Bamboo and Rattan (FRCBR), Bethlehem Vengthlangah Forest officer-te tan training an buatsaih. DP Ban­khwal, IFS (Rtd.), Assam leh Mizoram PCCF Dr. CHM Rao ten thu an sawi.

Aizawl District Legal Services chuan nimin khan Aijal Club-ah The Mizoram Victim Crime Compensation Scheme, 2011 hnuaiah misual kut tuara vanduaina tâwk mi 25 hnenah zangnadawmna an hlan a, sum sem zawng zawng chu Rs. 88,75,000 a ni. Mizoram Victims Crime Compensation Scheme-in a tum ber chu, mi tu pawh, misual kut tawrh vanga ramtuileiloa an awmin emaw, thihna an tawhin emaw an chhungte hnenah chhawmdawlna pek a ni.

Nausen, naupang, nu nau pai leh pawmte'n chaw ṭha (nutrition) an dawn ṭhat a pawimawhzia inzirtirna Rashtriya Poshan Maah (National Nutrition Month) pualin nimin khan Lawng­tlaiah kawng zawh (Poshan Rally) neih a ni a; Lawngtlai SDO (Sadar) Rochuangkimi Khenglawt-in a hmanpui. Rally-ah hian nu nau pai, nau pawm leh naupangte'n chaw ṭha an tlakchham vanga an hriselnain a tawrh dan leh chaw ṭha an hmuh theih nana ṭan lakna tur thu ziakte an keng a, an au rual bawk.