MR-te an hamṭhatna tur phûtin an pungkhawm

National Trade Union of Mizoram (NTUM) bultumin nimin khan Mizoram sorkara muster roll (MR)-a thawkte chu an hamṭhatna tur thil chi hrang hrang phûtin, Khatla (Upper Khatla)-a NTUM pisa bulah an pungkhawm a, buaina leh harsatna a awm lo.

An thil phût chungchangah hian NTUM hruaitute chu nimin chawhma dar 11:30 vel khan chief minister Zoramthanga chuan lêngah a sáwm a, an thil phût chungchang an sawiho. NTUM hruaitute leh Chief Minister an inbiak zawhah MR pungkhawmte chu an ṭîn darh a ni. NTUM hruaitute chuan, CM nena an inbiakna chu a lawmawm thawkhata an ngaih thu an sawi.

v    Provisional employee tih dinhmun pea MR-te vuah a nih chuan, Labour Law hman theih loh tur tih a ni a, chuti a nih chuan sorkar phal loh thil an tih loh nan/tihsual an neih palha dan ziak hmanga action lak nan, kaihhruaina (Conduct Rules/Mannual/Guidelines) pawimawh chin tal siamsak ni ve rawh se.

v    Leave hi mihring mamawh (basic need) a nih avangin earned leave pek phal a nih loh pawhin casual leave bakah, kum khatah ni 15-20 chawlh khâwlsak theihna min ruahmansak rawh se.

v    Damloh nikhuaa phurrit chhâwk nan medical benefit hi remchan dan ang anga kan neih phâk tur ruahmanna min siamsak se. Vawiin thlengin damlo enkawl ngai bakah cancer-te pawhin kan thi ve reng a ni.

v    Kum 60 tlina bàntir zel kan ni a, hun rei tak thawh hnuah mai-pár thlawn tawp a, kut ruaka chhuah a ni zel a. Pension benefit atana remchang (NPS, insurance, gratuity, etc.) hmuh theihna kawng eng emaw ber ruahmanna min siamsak rawh se.

v    Sorkar hnathawk pangngai aia hah zawk leh hnathawhnaah pawh dinhmun derthawng zawk kan ni a, office working hour pawn lama hnathawh a tam em em a, overtime allowance min pek dan ruahman se.

v    Mahni duty thawk thiam tak leh kum 10-20 chuang lai thawk tawhte kan nih avangin hlawh hi Group C leh D-te tan Rs. 25,000 leh Rs. 15,000 inkara a awm theih nan min ennawnsakin min siam ṭhatsak se. (Kum 5 danah pay revised min neihsak se, annual increment min siamsak rawh se).

v    Sorkar tana thawh (service/en­gage­ment) laia boralte dâwm zuina/zangna­dawmna remchang min siamsak rawh se.