MBSE-in zawhna siam dan thar inzirtir

Mizoram Board of School Education (MBSE) chuan nimin khan IPR conference hall, Kolasib-ah Kolasib district-a high school leh higher secondary school zirtirtute tan zawhna (question) siam dan zirna an buatsaih a, MBSE secretary Lalthangbika hoin hun an hmang. 

Lalthangbika chuan, MBSE exam pass percentage kum tina a san zel laiin, Mizo zirlaite India ram chhung hmun dangte nena an inelnaah an hniam zawk hle ṭhin tih sawiin, "Hei hian quality education kan neih tâwk lohzia a tilanga hriat a ni. Exam zawhna siam dan hian pawimawhna thûk tak a nei a, zirlaite leh zirtirtuteah nghawng nasa tak a nei tih hmuhchhuah a ni. MBSE-in kum 2020 HSLC leh HSSLC exam-a hman ṭan turin exam dan leh zawhna siam dan thar a duang a, chumi zûlzui chuan kuminah zirtirna kalpui mek a ni," a ti.

Training-ah hian MBSE senior academic officer C Laldinpuia leh academic officer Michael Lalrinmawia ten thil pawimawhte an zirtir a; kum 2020 MBSE exam-a hman ṭan tur Scheme of Examinations and Question Design te, Integrated Evaluation Scheme (IES) software update thar leh software manual-te inzirtir a ni bawk.