Parliament-a zawhna zawh loh chhan sawifiah turin ZPM-in LS MP an phût

Zoram Peoples' Movement (ZPM) party chuan, Mizoram Lok Sabha MP C Lalrosanga chu tun hnaia Parliament session thla thum vel chhung neihah Mizoram chungchang zawhna a zawh loh chhan sawifiah turin an phût.

ZPM chuan thuchhuah siamin, Parliament website-a a lan dan chuan, tun hnai Parliament session neihah India hmarchhak state tin aṭangin an state chungchang zawhna an zawt vek tih a lan thu an tarlang a, "Mizoram chung­chang chauh zawhna lut lo awm chhun a ni. Inthlan campaign lai khan Mizoram mamawh thlen tur ngah hlea insawi si, eng vanga Mizoram chungchang zawhna zâwt ve lo nge a nih tih hi ZPM chuan kan MP hi kan zâwt a ni," an ti.

September 16, 2019-a MNF office Mizo Hnam Rûna Mizoram MP C Lalrosanga'n thu a sawinaah, Parliament-ah chuan BJP-in an tam hneh thu sawiin, '….BJP lam an tam thamin min hneh si a, an bill put luh kan duh loh deuh pawh min pass hnan zel a…' tiin a sawi tih an tarlang a, "MNF hi NDA leh NEDA member an ni a, Delhi lamah BJP tlawn viau siin, Mizoramah BJP hnaih nih duh loin BJP hlat viau anga insawi an ching hle a ni," an ti. C Lalrosanga chu BJP bill put luh, a ṭan duh loh zawngah khawi lamah nge vote a pek tih mipui hriat ngeia puang turin an phût a ni.