Minister Zira'n ama mawng a hlim - BJP

BJP, Mizoram Pradesh chuan thuchhuah siamin, District Council & Minority Affairs (DCMA) minister R Lalzirliana'n autonomous district council pahnih - Mara ADC leh Chakma ADC chungchang a thil dik lo awm anga a sawi chu ama mawng a hlìmna mai a nih thu an tarlang.

Mizoram BJP chuan, MNF sorkara DCMA minister R Lal­zirliana chu sorkar hmasa (Cong­ress sorkar)-ah pawh DCMA minister tho a nih thu sawiin, "Kha'ng hun lai khan thil tih sual hi a lo hre lo nge, inquiry committee-te kut an phuar vang zawk, thil dik lo eng vanga hâi lang mai lo nge an nih, tih hi kan zawhna a ni," an ti.

Governor hnena thehluh hma leh thutlukna siam hmaa DCMA Minister-in a puangzar mai pawh chu pawi an tih thu sawiin BJP chuan, "Thu tàwp siamtu turin hma a lak hmaa thu dik tawk lo sawi hi thil serious tak, ADC member-te zahawmna thleng khawih thei a nih avangin, Minister hian Governor-in thutlukna a siam hunah puang zawk se tih hi a puitling zia hle a ni," an ti a; Congress sorkar leh MNF sorkara DCMA minister ni ve ve a nih avangin R Lalzirliana chu a intimualpho hlea an ngaih thu an sawi.

Mizoram BJP chuan, thil dik lo leh ṭha lo chu zawn chhuah a, a tisualtuin tuar zel se tih chu an dinna leh hmalakna a ni tih sawiin, "Mizoram pawh corruption free state ni tur khawpa sorkarna chelh­tu huaisen mipuite'n kan beisei kan la hmuh loh avangin, ADC mai nilo, state sorkarah pawh thil dik lo titu chu tu pawh ni se, sorkar hian vaw dûp hmiah zel se tih hi kan beiseina a ni," an ti.