MNF-in Martarte Ni an hmang

Mizo National Front (MNF) chuan nimin khan Mizoram hmun hrang hrangah Martarte Ni an hmang. Aizawlah chuan MNF president Zoramthanga, chief minister ni bawk hoin Vanapa hall-ah hman a ni a; Zoramthanga chuan, martarte chu mahni ṭánghma haina atan hman tur an nih loh thu a sawi.

Aizawla Martarte Ni hmanna inkhawm chu MNF vice presi­dent Dr R Lalthangliana, minis­ter ni bawkin a kaihruai a; MNF President chuan, martarte chu a hmanna tur dik taka hman tur an nih thu sawiin, "Martarte hi mahni ṭánghma haina atan hman tur a ni lo. An thih pawhin 'Pathian leh kan ram tan' a ni tih hre chunga pên chhuak an ni tih hriat tur. Hlâwkna ûma hai bawrh bawrh nan i hmang lo ang u. Kan ramin malsawmna a dawng dawn, chu chu kan vaiin kan chang dawn a ni," a ti.

Zoramthanga chuan, Mizote chu hnam hrang hrang hual vela awm an nih thu sawiin, "Min hual vêltu an tam si a, keimahni ringawt chuan kan ral dawn. Chuvangin, hnam thuthlung a ngai a ni. Hmânah pawh hnam thuthlung a awm tawh a, a chhi alhtu chu ṭâm a ni. Mizo National Famine Front a ding a, chumi hnuah MNF tia thlak a ni," a ti a; harsatna tam tak leh indona eng emaw zat a paltlang hnuah MNF-in tun dinhmun a thlen thu a sawi.

MNF-te chu an tling lo leh fel lo chungin 'Pathian leh kan ram tan' an tih tlatna chu felnaa ruat a nih thu sawiin MNF President chuan, "Pathianin min hruai chhuah dan hi i hre reng ang u. Hnam movement hian rálthuam nena beihna a tawng a, Mizoram beih ang tluka India sorkarin a beih an awm lo. Chung karah pawh Lalpan min humhim a ni. Rambuai hma aṭanga remna a awm hnu thlengin MNF hian politics-ah pawh beihna a tâwk nasa hle," a ti.

Zoramthanga chuan, Aizawl Luangmuala Martarte Thlanmual chu MNF party ta anga a kal chu ṭha a tih loh thu sawiin, "Ka mimal ngaihdan chuan, Martarte Thlanmual hi sorkarin nei se, a enkawltu department-te ruatin, chawkidar-te dah ila ṭha ka ti. Tu pawh sorkar se, mipuite'n 'Kan ta' an tih theihna tura siam a ngai. Museum leh auditorium-te a bulah hian dah ni se," a ti a; Martarte Thlanmual chei ṭhat hna pawh MNF ni loin, sorkarin thawk tawh se tih chu a mimal ngaihdan a nih thu a sawi.

Zoramthanga chuan, beihna an tawh leh nasat dawn thu sawiin, "Tunah pawh min bei ṭan mek a, min beih ngaihna vak an hre lo. 'Pu Zorama chu rua chiah a ngaihtuah' tih te, 'CM-in pawisa bak a ngaihtuah lo' tih te, 'Dr BD Chakma minister-ah an dah dawn' tihte bak min beihna an hre lo. Finance changtu nih chuan pawisa ngaihtuah a ngai a ni," a ti.

Mizoram hmun hrang hrangah Martarte Ni puala hun hmanaah minister, MLA leh MNF party hruaitute an tel a, martarte thlânahte zahna pangpar an dah hlawm a ni.