Mizote dinhmun a him lo hle - Lal Thanhawla

Mizoram Pradesh Congress Committee (MPCC) president Lal Thanhawla chuan, "Ringtu kan nihna hi dinhmun hlauhawm takah a awm mek a, sakhaw pakhat, ṭawng pakhat, dan pakhat kalphung tih puitlin tumin BJP sorkarin hma a la mek a ni," tiin, tunlaia Mizoram leh Mizote dinhmun chu a him lo hle niin a sawi.

Nimina Congress Bhavan-a in­khawmah thu sawiin Lal Thanhawla chuan, tun hnai lawkah mi za rualte chu vai pathian hlate chhamin Chief Minister's Office tualah an duh tâwkin an khawsa thei tih a sawi a, "Khang ho kha RSS tirhkoh dik tak an ni. Mizote erawh chu CMO-a kal tur phalsak an ni lo. Kha thil thleng khan kan ṭan rual a ngaihzia a tichiang hle," a ti.

Lal Thanhawla chuan, MNF-in a thurualpui BJP kaihhruai sorkar chu khawvel sorkar zingah ram chhung ei leh bar dinhmun tlakhniam chak berna a ni mek tih sawiin, "Ramin harsatna a tawh apiangin Congress party hi a chhanchhuak turin Pathianin a sorkartír leh ṭhin. Kan sorkar leh loh chuan he ram hian Malsawmna a dawng thei dawn lo," a ti a; tunah chuan sorkar laipuia BJP sorkar tlawn tumte an sorkar mek tih a sawi.

District thar pathum siam chung­­changah Lal Thanhawla chuan, district thar chhunga mipuite an lawmpui hle tih a sawi a; chutih rualin, "Inkhualtelem ang leka kalpui chi a ni lo tih i hria ang u," a ti.