KHAWTHLIR

India rama infiammite chawimawina Dhyan Chand Award dawngtu C Lalremsanga, thal kah thiam (archery) pualin September 19, Ningani khan Berawtlangah lawmpuina inkhawm buatsaih a ni a, chief minister Zoramthanga'n a hmanpui. C Lalremsanga hi kum 1992-2002 chhung India aiawihin archery intihsiaknaah a tel a; kum 1992 Barcelona Olympics, 1996 Atlanta Olympics, 1994 Hiroshima Asian Games leh world championship pangaah India aiawhin a tel. Khawvel huap intih­siakna dang eng emaw zatah a tel bawk. August 29, 2019 khan Dhyan Chand Award hlan a ni.

Sihphir WATSAN Committee leh village council-te chuan 'Swachh Hi Seva' hmangin nimin khan Sihphir khaw chhungah faina hnatlang an huaihawt a, an khuaa sikul hrang hranga zirlai leh zirtirtu mi 700 chuang an thawk chhuak. Hnatlang hi Plastic Free Village (plastic hman lohna khua) an nih theih­na tura hmalakna a ni a, Swachh Hi Seva puala prime minister Narendra Modi thuchhah chhiar chhuah a ni.

Drug-Free Mizoram Foundation leh Health Department hnuaia Food & Drugs Administration chuan nimin khan Zemabawk Higher Se­condary School zirlaite tan Zemabawk YMA Hall-ah Drug Awareness Campaign an buatsaih a, AMC councillor (Ward no. 1) R Zomuanpuii'n a hmanpui. He hunah hian Zemabawk HSS zirlai mi 200 chuangte chu ruihhlo ti lo turin an intiam a ni.

Traffic SP chuan thupek chhuahin, zan lama New Market chhunga lirtheia tlân lut tur reng reng, Chanmari aṭangin Power House lam aṭang chauha tlân luh tur a nih dawn thu leh, Saron Veng/Chhinga Veng lam 

aṭanga tlân luh phal a nih dawn loh thu a tarlang. Thupek hi September 23, 2019-ah hman ṭan tur a ni a, New Market chhung aṭangin Chhinga Veng/Saron Veng lamah chauh tlân chhuah tur a ni bawk.