PIB-in Aizawlah media workshop an buatsaih

Press Information Bureau (PIB) chuan nimin khan Aijal Club-ah media workshop - Vartalap (Media Conference on Improving Information Dissemination in Mizoram) an buatsaih a, Lok Sabha MP C Lalrosanga khuallian niin, chief electoral officer (CEO) Ashish Kundra khualzahawm a ni.

Lok Sabha MP C Lalrosanga chuan, media mite chu sorkar laipui scheme hrang hrangte puangzar uar tur leh sorkar hmalaknaahte feedback petu tur an ni tih hre reng turin a chah a, "Union minister leh ministry hrang hrangte'n MP ka nihna angin Mizorama thuthar thehdarhtute chu sorkar laipui scheme, programme leh policy-te tam zawka puanzar a nih theih nan ṭan lakpui turin min ngen a ni," a ti.

C Lalrosanga chuan, thuthar thehdarhtute chu an thiltih theihna hmang thiam a, thingtlang kilkhâwr zawka awmte hnenah sorkar hmalaknate leh hamṭhatna an dawn theih hrang hrangte hrilh turin a chah a, "Central-ah chuan tu pawh sorkar se, mipui hamṭhatna leh hmakhua ṭhatna ang chi chu ramri hrúla mite leh hmun kilkhâwra mite hriattir a pawimawh hmasa ber a ni," a ti a; a hma aia nasa zawka hma la turin thuthar thehdarhtute a chah.

Mizoram Lok Sabha MP chuan, India sorkarin mipui hamṭhatna tur a ruahman hrang hrangte Mizoramin a hlawhtlinpui dan emaw hlawhchhampui dante emaw felfai taka khawn khawm zung zungtu tur, media-te pawhin 

ṭangkai taka an hman theih tur department Mizoram sorkarin siam thei se a duh thu a sawi a; Mizote chu thil chi hrang hrang ti kual duah chi an nih avangin, thlùr bing bik thil nei tura rilru siam a ṭul thu a sawi bawk.

Media workshop-ah hian Aizawla media firm hrang hranga thawkte an tel a; CEO Ashish Kundra, PIB director general (NE Region) LR Vishwanath leh MJA president Zonunsanga Khiangte te pawhin thu an sawi a, mithiamte'n paper an buatsaihte an chhiar chhuah bakah, sawihona hun hman a ni.