Aizawla hmun him leh him lote zirchianna minister Dr R Lalthangliana'n a tlangzarh

Geology & Mineral Resources department-in Aizawl Municipal Corporation (AMC) huam chhung leh Aizawl khawpui chhehvel leilung him leh him loh zirchianna, 'Delineation of Urban Development Zones (DUDZ) with a Special Reference to Landslide Risk and Slope Stability: Aizawl City, Mizoram’ tih chu September 19, Ningani khan minister Dr R Lalthangliana'n a tlangzarh.

DUDZ with a Special Reference to Landslide Risk and Slope Stability: Aizawl City, Mizoram hi Geology & Mineral Resources (GMR) department mithiamte'n kum 2014-a an buatsaih ṭan a ni a; buatsaihna senso cheng nuai 230 zinga 90% chu North Eastern Council (NEC)-in a tum a, Mizoram sorkarin 10% a tum ve thung.

Dr R Lalthangliana chuan, Aizawl khawpui chhung him leh him loh chungchangah mipui an fimkhur chho zel tih sawiin, "Chhiatrupna thlen thulha a sâng tél nunna chàn theihna leh cheng vaibelchhe tam tak chàn theihna tur hmunah hian vanduaina kan la tawh loh avangin inthlahdah ngawt a thiang lo. Kan him tlànna turah theihtawpin kan ṭang tlang ang a, mahni remchanna atan ringawta mi dangte himna kan dahkhamte hi kan sim tlàn a ngai a ni," a ti.

DUDZ with a Special Reference to Landslide Risk and Slope Stability: Aizawl City, Mizoram project hnuaiah hian AMC ward 19 leh a chhehvel bial pasarih, square km. 175-a zau huam chhungah zir chianna hmun/bial (facet) 4,124 siam a ni a; facet-te chu satellite data, collateral data leh tehna chi hrang 15 hmanga zir chian a ni.

Zirchianna/facet 4,124-te chu - hmun him lai - very low hazard zone (VLH) <3, hmun him thawkhat - low hazard zone (LH) 3.5 - 5.0, hmun him tâwk lo - moderate hazard zone (MH) 5.0 - 6.5, hmun him lo - high hazard zone (HH) 6.5 - 8.0 leh, chenna in sakna tlak loh - very high ha­zard zone (VHH) >10.0 ahte ṭhen hran a ni.