ZPM-in chî-âi lo turin mipui an chah ZLP ṭhiah chhan MLA inthlan atana inhmakhuana - ZPM
Zoram Peoples' Movement (ZPM) chuan thuchhuah siamin, Mizoram Assembly-a ZPM Legislature Party (ZLP) September 18, 2019-a ṭhiah a ni ta chu kum 2023-a MLA inthlan lo awm tura MNF-te inhmakhuana a nih thu an tarlang a; ZPM MLA-te dinhmunah thil danglam a awm lo tih sawiin, mipuite chu chî-âi lo turin an chah.
ZPM chuan, ZLP ṭhiah a nih chhan chu ZPM hotute'n an zawt chiang nghal tih sawiin, "Official lam chuan dan tlawhchhan nei loin, Assembly Speaker thupek bawhzuia tih a nih thu an lo sawi. Speaker hian thupek khauh tak chhuah tur hian chung lam aṭangin thupek khauh tak a dawng a nih a rinawm a, hreh tak chungin he thutlukna hi a siam a nih a rinawm," an ti.
Mizoram Legislative Assembly ding lai chu a pian veleh ZPM MLA pasarihte'n dan ang thlapin ZPM Legislature Party an din a, Assembly Speaker pawhin a pawmpui tih sawiin ZPM chuan, "Tun hnaiah ruling MNF hian ZLP leh ZPM party hnawk an ti em em a, MLA-te chungah kutthlakna remchang an dap ngar ngar a, dan tlawhchhan pawh nei chuang loin, mipui thlan tlin MLA-te a huhoa an thawhhona ZLP a ṭhiahsak a ni," a ti a; an MLA-te dinhmunah thil danglam a awm loh thu an tarlang.
ZPM thuchhuak dangte
# Eng vanga kutthlakna tur zawng ngar ngar nge an nih tih tumahin kan hai âwm lo e. Thla kuaa upa MNF sorkar hi Mizoram mipui thinlungah a nitin a hniam telh telh tih an hai lo. Kum 2023-a MLA inthlan a awm leh hunah MNF party tana hlauhawm ber tur chu MLA pasarih thlang tlingtu ZPM a ni tih an hre chiang a, dik leh dik lo pawh thlu loa ZPM mipui leh an MLA-te tihbuai hi 2023 inthlan hun atana an inhmakhuana hlâwk ber tura an ngaih vang ni berin a lang.
# Mizoram Legislative Assembly-ah hian independent group-in an siam legislature party a awm fo tawh ṭhin a, mipui thlan an nih avanga zahin, tu party leh sorkar mahin ṭhiah tumin emaw, kutthlak tumin emaw an veh an veh ngai lo. Tuna MNF sorkar chauh hi mahni MLA-puite tihbuai dan kawng dap ngar ngar awmchhun an la ni a, rem leh rem loa kutthlakin, Legislative Assembly-ah hian history kha tak an siam ta a, anmahni tan pawh a mualphothlak a, ram tan pawh a vanduaithlak hle tih hi ZPM ngaihdan a ni.