J&K Investors' Summit neih tur nakkumah sawn

J&K Investors' Summit October 12-14 a neih tura ruahman lawk chu nakkuma neih tura sawn a ni.

Governor Satya Pal Malik kaih­hruaina hnuaia State Administrative Council (SAC) ṭhukhawm chuan kumina J&K Investors' Summit neih tura ruahman lawk chu ennawnin, sorkar laipui remtihnain nakkuma nei turin thutlukna an siam.

India-in investment lama hma a sawn theihnan Investors' Summit hi sorkar hmalaknaa buatsaih ṭhin a ni. He mi atana hmalatu ber chu Industries and Commerce (I&C) Department an ni. 

Nakkuma sawn a nih chhan hi tunhnai lawka J&K-in special status an neihna Article 370 hlihsak vanga J&K la him tawk loh vang a ni. SAC chuan nakkuma Investors' Summit neih tur hi a hun leh ni chu sorkar laipui rawn chunga, J&K-a an hmalakna ngaichang chung zela an ruat tur thu an tarlang.