Thla 27 chhungin lirthei 50,084 ziak lut thar
Transport department chuan sorkar kum 2017-18 aṭanga kumin June 30 thleng (thla 27 chhung) khan lirthei chi hrang hrang 50,084 an chhinchhiah (register) thar a; chu'ng zinga a tam ber chu two wheeler niin, lirthei register thar zawng zawng aṭangin 73.39% a tling. Ni tin lirthei 61 vel register thar a awm ziah ang a ni.
RTI Act hmanga zawhna Transport department-in an chhàn danin, kum 2017-18 (April 2017) aṭanga June 30, 2019 thlenga Mizoram sorkara lirthei ziah luh thar 50,084 hi chawhrualin thla tin 1,854.96 lirthei register thar a awm ziah ang a ni a; ni tin (sorkar pisa chawlh zawng zawng huam vekin) lirthei 61 vel register thar a awm ziah ang a ni bawk.
Kum hnih leh thla thum chhunga lirthei ziah luh zinga 36,757 chu two wheeler a ni a, chu chu lirthei ziah luh zawng zawng aṭangin 73.39% a ni. Lirthei dang register thar chu 26.61% chiah a ni a; LMV register thar 8,553, bungraw phur chi lirthei ziah luh thar 4,306, maxicab register 409 leh bus register thar 59 a awm.
Lirthei register zawng zawng zinga 34,173 chu Aizawl District Urban DTO (MZ-01)-a ziah luh a ni a, chu chu 68.23% a ni. Aizawl Rural DTO-ah ziah luh thar 2,398 awmin, Aizawl district pumpuia register thar zat chu 36,571 a ni a, Mizoram puma lirthei register zawng zawng aṭangin 73.019% a tling.
Kum hnih leh thla thum kal ta chhung khan chawhrualin, Aizawl Urban DTO bikah thla tin lirthei 1,265 vel ziah luh thar a awm ziah ang a ni a, ni tin lirthei 41.62 register thar ziah ang a ni bawk. Mizoramah High security registration plate (HSRP) kalpui a la nih leh nih loh leh, motor registration ti tharte tan HSRP hman ngei a ngaih leh ngaih loh zawhna chu Transport department chuan, HSRP chu Mizoramah la kalpui a nih thu an tarlang.
Transport department chuan, "New motor registration tan phei chuan Ministry of Road Transport & Highways notification S.O.6052(E) sawi angin hman ngei ngei a ngai. HSRP Laser Code hi Vahan database-a chhut luh loh chuan smartcard a chhuak thei tawh lo," an ti.