KHAWTHLIR

Naute leh nuin chaw ṭha an ei a pawimawhzia inzirtirna thla, Rashtriya Poshan Maah (National Nutrition Month) hman mekah lunglei ICDS Project chuan September 21, Inrinni khan Lung­lei khawpuiah chaw 

ṭha chungchang inhrilh­fiahna Food Mela an buatsaih. Food Mela hi Lunglei ICDS Project circle officer F Lalnun­tluangi leh anganwadi worker-te'n an buaipui a, Lunglei khawpui chhung hmun hrang hrangah leh bazarpuiahte kalin, thlai leh thei zawrh laia chakna awm dan, nu, naupang leh puitling tana a ṭhate an sawifiah a ni.

Excise & Narcotics-a Anti Narcotic Squad leh Central YMA hnuaia SRS-te chuan September 20, 2019 zan khan Sakei Bangla-ah tlaivarin  an duty a, Champhai leh Zokhawthar aṭanga lirthei kalte endikin, lirthei 17 an enfiah a, heroin hawng 11 an man. Heroin hawng 11 zinga hawng 5 chu David Zohmangaiha, Bawngkawn Hmarveng nia inchhál ta a ni a, hawng 6 erawh chu a neitu hriat a ni lo.

Baptist Church of Mizoram (BCM), Lung­lei Electric Veng koh­hran chuan September 14 aṭanga nimin thleng khan an kohhran kum 50 tlin, golden jubilee an lawm a, jubilee puala an sak Golden Jubilee Building chu September 20 khan Rev. Dr CL Hminga' a hawng. Zirtawpni zan khan jubilee mei an dêt a, Inrinni khan a lawmna pui ber hmangin, awmni khamin an lawm a, tlaiah jubilee lawmna ruai an ṭheh a ni. BCM Electric Veng, Lunglei hi September 21, 1969-ah din niin, Chanmari aṭangin an indang a, member 1,780 chuang an awm mek a ni.

September 21, Inrinni khan Vaivakawn Branch KṬP chuan an kohhran hall-ah blood donation camp an huaihawt a, Aizawl Civil Hospital tan mipa 23 leh hmei­chhia pangate'n thisen unit 28 an pe. Himali Bial KṬP pawhin Synod Hospital tan thisen unit 21 an pe a, a petute mipa 19 leh hmeichhia pahnih an ni. Seling zirlai pawlte chuan Aizawl Civil Hospital-ah thisen unit 15 an pe bawk a, a petute mipa 14 leh hmeichhia pakhat an ni.