Health Minister-in Civil Hospital a tlawh
Health & family Welfare minister Dr R Lalthangliana chuan September 21, Inrinni chawhnu khan hrilh lâwk loin Aizawl Civil Hospital Out Patient Department (OPD) leh Blood Bank-te a tlawh a; thawktu indaih lohna phuhru turin hmalak mek a nih thu a sawi.
Mizorama model blood bank awmchhun, Aizawl Civil Hospital (ACH) Blood Bank a tlawhnaah Health Minister chuan chipchiar takin a fang a, blood bank a thawktute an fakawm a tih thu a sawi. Blood bank-ah indaih lo chunga phunnâwi loa an thawh ṭhin avanga lawmthu hrilhin, thawkte indaih lohna a hria a, indaih lohna phuhru turin hmalak mek a nih thu a sawi a ni.
OPD a tlawhnaah R Lalthangliana chuan, ACH a tlawh chhan chu tun hnaia Mizoram sorkar damdawi-in hrang hranga OPD inentir hun leh inentir dan tur thupek chhuah thar chu mipuite'n an chhawr ṭangkai dan a taka hriat a duh vang a nih thu a sawi a; thawktute chu mipui tana thawk an ni tih hria a, ṭhahnemngai taka thawk chhunzawm zel turin a fuih.
Health department chuan tun hnaiah thupek chhuahin, Mizoram sorkar damdawi-in zawng zawngah OPD chu Inrinni tin hawn ziah tawh turin a ti a, Inrinni vawi hnihna erawh chawlh tur a ni thung. Zing dar 9 aṭanga chawhnu dar 1 thleng OPD card lak chhuah theih tura tih niin, OPD card hlui leh thar latu, registration number nei tawh reng reng chu hnâwl (reject) phal a ni lo.