MSHCS atan inziahluhna hun hawn mek a ni

Mizoram sorkarin Mizoram State Health Care Scheme (MSHCS) a duan thar chu October 1, 2019 aṭanga hman ṭan tur atan tunlai hian inziahluhna hun hawn mek a ni. MSHCS hnuaiah hian kum khatah chhungkaw pakhat tan damdawia inenkawlna senso Rs. 2,00,000 thleng hmuh let theih a ni ang.

Health department hotute hnen aṭanga Vanglaini thu dawn danin, MSHCS hian a huam chin turte chu sorkar laipuiin health care policy a duan, Ayushman Bharat - Pradhan Mantri Jan Arogya Yojana (AB-PMJAY) hmang ve thei lote a huam a, Mizoram chhung bakah, phai lama inenkawlnate pawh a huam tel. Inenkawlna bill theih tur chu Mizoram sorkar bithliah notified rate ang a ni.

MSHCS hnuaia inziahluhna hun hi health worker, local council/village council leh YMA hruaitute'n an buaipui tur a ni a, veng/khaw ṭhenkhatah chuan inziahluh zawh a ni tawh. Ṭum khat inziah luhin kum khat chhung zel a huam a ni.

Hetih lai hian, AB-PMJAY chu a ngai anga kalpui reng a ni a, chhungkaw pakhatin kum khatah Rs. 5,00,000 thleng an bill thei. AB-PMJAY-in a huam­te chu, Ministry of Rural Development hnuaia Socio Economic Caste Census (SECC), 2011 deprived list (chhungkaw harsa leh hnuaihnung)-a telte leh kum 2018-a RSBY hnuaia smart card neite an ni.

AM-PMJAY hnuaia inziak lutte tan chuan pawisa pe nghal lo (cashless)-in damdawi-inah inenkawl theih a ni a, kal velna leh zin veivahna erawh a huam lo. Scheme hnuaia inziak lutte chu India ram puma sorkar damdawi-in leh sorkarin a pawm mimal damdawi-inah an inenkawl thei ang. AM-PMJAY hnuaia inziak lutte tan sorkar damdawi-inah golden card siamtir theih reng a ni.