Aizawl district chhunga bank branch 105-in thla 3 chhungin cheng vbc. 7,347.86 an hmu

Aizawl district-ah bank hrang hrang 27-in branch 105 an nei mek a, chu'ng bank branch 105-a sorkar kum kal lai, 2019-2020-a first quarter April-June 2019 chhunga deposit (sum dah luh) an hmuh zat chu cheng vbc. 7,347.86 a ni.

September 20, 2019 khan Aizawl DC Conference Hall-ah District Consultative Committee (DCC) / District Level Review Committee (DLRC) & District Level Security (DLSC) meeting neih a ni a, Aizawl additional DC John LT Sanga'n a kaihruai. Kum 2019-20 financial year-a first quarter (April, May & June) chhunga Aizawl district-a bank-te dinhmun thlirho a ni a, sorkar scheme hrang hrang leh a pumpuia bank loan pek tur target an tlin theih dan turte sawiho a ni bawk.

Meeting-a tarlan danin, April-June, 2019 chhung khan Aizawl district-ah bank chi hrang 27 a awm a, bank 27-te branch neih belhkhawm chu 105 a ni. Bank branch-te chu - public sector bank branch 42, private sector bank branch 20, regional rural bank branch 34 leh cooperative bank branch pakua a ni.

Branch  105-te'n April-June 2019 chhunga deposit an hmuh zawng zawng chu cheng vbc. 7,347.86 a ni a, loan an pek chhuah (advances) zat chu vbc. 2,708.26 a ni thung a; deposit aṭanga advances zat, credit deposit ratio (CD ratio) chu 37% a ni.

Priority sector-a loan pek chhuah zat chu cheng vbc. 211.63 a ni a, chu chu loan pek chhuah zawng zawng aṭangin 7.81% a ni. Agriculture lama loan pek chhuah chu vbc. 56.06 niin, loan pek zawng zawng aṭangin 2.06% chiah a ni a, MSME advances (industry leh business loan) chu vbc. 108.59 (4.00%) a ni bawk.

Meeting kaihruaitu John LT Sanga chuan, Aizawl district-a CD ratio chu district dangte aiin a hniam hle tih sawiin, "A chhan chu bank-te'n loan an pek chhuah tlem vang a ni," a ti. Aizawl district-a bank-te chu loan pek chungchangah beiseina sang tak a neih thu sawiin, bank ṭhenkhat, a bikin private bank-te chu mipui/sorkar deposit dawng tur ringawt ni loin, district hmasawnna tura mipui hnena loan pek chhuah lamah ṭang leh zual tur leh mipui tana thawk tam leh zual turin a chah.

Aizawl South-I bialtu MLA C Lalsawivunga chuan, a constituency chu Aizawl district chhung a nih angin a bial mite'n hamṭhatna an neih theih turte a sawi a; eng bank pawh ni se, a bial chhunga Bethlehem Veng leh Republic Vengthlang huam chhungah ATM booth pakhat ve ve tal dah theih ni se a duh thu a sawi bawk.