Veng ramri chungchangah buaina tênau chhuak

September 21, Inrinni khan Aizawla veng lailí, Chanmari leh Zarkawt veng ramri chungchangah inhriatthiam lohna a awm avangin MacDonald Hill-a School Education Directorate thlangah veng pahnih ṭhalaite pung khawmin an inep a, venhimna hna thawktu police nena innawr buaina awm mah se, buaina leh harsatna lian tham a thleng lo.

Thu dawn danin, tun hnai khan Chanmari khawtlang chuan an veng ram chin nia an hriat, School Education Directorate thlangah welcome signboard (Chanmari Veng i lo thleng ta) tih chu an târ a, chu chu Zarkawt lamin an veng chhung nia an ngaih ve bawk avangin an phawisak a ni.

Boruak a reh vang vang hnuah Chanmari khawtlang chuan welcome signboard chu Inrinni chhûn khan phun leh an tum a, YMA hruaitute leh ṭhalai eng emaw zat an thawk chhuak a ni. Chanmari khawtlangin signboard tàr an tum tih hriain Zarkawt ṭhalaite pawh eng emaw zat an pungkhawm bawk.

Signboard târ tumtu Chanmari veng mite chu police-te'n an lo dang a, rei vak lo innawr mah se, buaina leh harsatna lian zawk a chhuak lo a; Chanmari khawtlang hian signboard pawh an târ ta rih lo a ni.