Hlawhtling turin degree leh certifcate ringawt a tawk tawh lo - Dr K Beichhua

Mara Students Organisation (MSO) Sub-Headquarters, Shillong chuan Inrinni khan NEHU Convention Hall-ah Annual Function an hmang a, minister of state Dr K Beichhua'n a hmanpui. Minister chuan, hlawhtling turin degree leh certifcate ringawt a tâwk loh thu a sawi.

Dr K Beichhua chuan zirlaite chu ram nghahfak an nih thu sawiin, "Nangni hi kan ram  nghah mekte in ni. Central service kan neih mekte hnung rawn zuitu tur in ni a, competition sang tawh takah a ṭha ber ni tura rilru in neih a ngai a, Shillong in awm chhan hrechiang ula, thawhrim a ngai tak zet zet a ni," a ti.

Dr Beichhua chuan tunlaiah hlawhtling turin degree leh certificate ringawt a tawk tawh lo tih sawiin, "Taimakna nen peihrei  a ngai tawh a ni. Lehkha zirlai hun hi nakina kan eizawnna atana training lakna hun a ni. Ruihhlo leh zu lakah kan fihlim a ngai a, a fihlim lo kan lo awm palh a nih pawhin vawiin aṭangin kawng dik i zawh ṭan ang u," a ti a, mi ramah inlungrual taka awm turin a chah.

Inkhawmah hian zirlai ti ṭhate chawimawina hun hman nghal a ni. MSO hi Shillong-ah hian kum 1965-ah din a ni.