MR zirtirtu laknaa dik tâwk lo awmah a ṭul anga hmalak a ni dawn tih CM-in a sawi - Vanlalzawma

Vanlalzawma hian nimin khan Mizo Hnam Rûna inkhawmah thu sawiin, nimin zing khan Chief Minister nen an inbiak thu a sawi. A sawi danin, Chief Minister hian, 'Zirtirtu MR lak result tihchhuah chungchangah, School Education Minister chu phai lama a zin a lo haw mek a, a lo haw hunah thil fel tâwk lo leh siamṭhat ngai chu a ṭul angin hma kan la ang,' tiin a sawi a ni.

Vanglaini palai zawhna chhangin Vanlalzawma chuan, MR zirtirtu lakah hian thil fel tâwk lo a awm niin a sawi a, "A khaw mite duhsak an ni ang a, a khaw mi an awm loh chuan a khaw hnaia mite duhsak an ni ang, tih a ni. Mahse, a khaw mi dil an awm reng laiin, a khaw hnaia mi pawh ni lo, hmun dang daiha mite lakte an awm a, siamṭhat ngai neuh neuh a awm nualin a lang," a ti.

MNF Treasurer chuan, MR-a thawk tur zirtirtu laknaa fel tâwk lo leh siamṭhat ngaiah a ṭul anga hmalak tumna chu MNF party mi leh sate thun tumna ni loin, thil dik lo awm chinfel tumna niin a sawi bawk. Primary school leh middle school-a thawk tur zirtirtu 881 lak hna hi district tinah kalpui a ni a, DC-te kaihhruaina hnuaiah a latu tur ruat a ni. Diltute'n mahni duhna sikulah ṭheuh dil a ni a, interview hmanga lak a ni. Result chu September 20, 2019 khan tihchhuah a ni a, a tlingte erawh appointment order pek a la ni lo.