Ram pum huap inthlanah party dang kan thawhpui tawh lo ang - ZPM President

ZPM president Lalliansawta chuan nimin khan an party pisa-ah thu a sawi a; ram pum huap inthlanah political party dang nen an thawhho tawh loh tur thu a puang.

Lalliansawta chuan, MP inthlanah party dang an thawh­pui avangin ZPM beiseitute lung an tiawi lo hle tih an hriat thu sawiin, "Khami avanga kan lungawi lohnate kha tunah chuan dahṭha tawh ila, hma lam i thlir tawh ang u. Tun hnuah chuan, ram pum huap inthlannaah ZPM hi party dangte nen kan thawkho ngai tawh lo ang," a ti a; kalphung thar, mipui sorkar din turin an inbuatsaih tih a sawi.

MNF sorkarin remchang zawng zawng leh remchang lo chung pawhin ZPM leh an thlan tlin MLA-te an bei char char tih sawiin ZPM President chuan, "A mak tih mai loh chu sawi ngaihna a váng hle. Ngawi renga dawh tur nge, a ṭul ang anga do lêt tur tih hi kan hruaitute'n remchangah an la sawiho ang," a ti.

Lalliansawta chuan, ZPM chu party a nih aṭangin thla thum a pumhlûm ve tawh tih sawiin, "Headquarters-ah mawhphurtu kan insiam fel thawkhat ta a, tunah chuan thingtlang lam kohna chhángin kan feh chhuak thei tawh ang," a ti a; thingtlang mite kohna chu zahawm an tih thu a sawi.

ZPM President chuan, MLA inthlanah neutral mipuite avangin bial pariatah an chak a, MLA pa­sarih an neih thu a sawi a, "MP kan han thlang leh a, kan candidate-in a zir bawk a, vote kan hmu ṭha hle a, a rûka lo lut fo­reigner, vote nei ve tlat site hmanga hneh kan ni. Mipui bei­seina kan dawn tam ber chu, kum 2023 MLA inthlanah ZPM hun a chhuak tawh ang tih a ni," a ti.

Politics hmangin ram rawng­bawl an tum thu sawiin Lallian­sawta chuan, "Ram neitu chu Pathian a ni a, politics dik chu Pathian rawngbawlna a ni. Pathian tilungawi tel tlatin politics kan khel ang. Kan chungah Lalpa a lawm phawt chuan, he ram siam ṭha turin Pathianin min dah ngei ang," a ti a; 'Pathian remtih zawngin kan awm em' tih chu an tehfung ber tur a nih thu a sawi.