Parliament zir turin MJA leh IPRO-te an kal

Lok Sabha Secretariat-a Bureau of Parliamentary Studies and Training (BPST) hun hmang turin IPR department officer pangate leh Mizoram Journalists' Association (MJA) member 15-te chuan nimin khan New Delhi panin Mizoram an chhuahsan a, IPR minister Lalruatkima'n a vai liam.

IPR director Lallianpuii pisaa thlahna inkhawmah Lalruatkima chuan, IPR officer-te leh chanchinbumite a vawi khatna atan Mizoram sorkar tirha Lok Sabha Secretariat-ah training an nei tur chu lawmawm a tih thu a sawi a, "Mizoram tan thil thar tam tak zir chhuah tur a awm tih sorkarin a hriat avangin, an kalna tur sum a tumsak a, ruahmanna a siamsak a ni," a ti.

Lalruatkima chuan, sorkar flagship programme SEDP leh sorkar project hrang hrangte a chhawrtu tur mipuiin an chhawr ngei theih nan sorkar hmalakna leh ruahmannate mipui hnena puangzar leh zirtir turin journalist-te an pawimawh thu a sawi a, "Thawhhona ṭha leh inpumkhatna a awmnaah chuan ramin hma a sawn a, pawl a ṭhang a, sorkar hmalakna a chak zel," a ti a; training-a tel turte chu Mizoram tan zir chhuah pakhat tal nei tur te, report ziak tur leh an report aṭanga mipuite chona thar siam turtein a chah a ni.

MJA president Zonunsanga Khiangte chuan, tun ṭuma chanchinbumite zin dan chu Mizorama la awm ngai lo a nih thu a sawi a, "Lok Sabha hiala training thei tura chanchinbumite sorkarin a tír hi MJA kan lawm tak zet a, Mizoram journalist-te'n rahbi thar kan kai a ni," a ti.

Training hi September 25-27, 2019 chhung neih tur a ni a, Parliament leh legislature kaihhnawih thil pawimawh hrang hrang an zir dawn a ni. Kal zingah Aizawl bakah district tin aṭangin MJA member-te an tel a, IPR department aṭangin joint director Lalramliana Chawng­te leh officer dang pali an tel bawk.

Bureau of Parliamentary Studies and Training-ah hian Mizoram Legislative Assembly member (MLA)-te pawh ṭum eng emaw zat training-in an kal tawh ṭhin a, mithiamte'n Parliament leh assembly-a rorel dan an zirtir ṭhin a ni.