Mizoram leh Assam ramri hi a khirh hle - Home Minister

Home minister Lalchamliana chuan, Assam leh Mizoram ramri chu a khirh hle tih sawiin, "Muangchángin, a theih anga chak siin kan dinna nghet taka siam turin kan pên zel a ni," a ti.

Home Minister hian nimin khan Mizo Hnam Rûnah thu sawiin, "Ramri chungchang hi an sawi peih hlawm a, an right a ni a, inkhap ngawt theih a ni lo. Sorkarin theihtawpin a ngaihven a ni. A zir chiangtu tur committee ruat a ni a, an ti chak vak thei lo nge, report a lo la lut lo. Ramri hi party mal ngaihtuah chi a ni lo," a ti a; Committee-in report an thehluh hunah political party zawng zawng leh ramri veitute nen report chu ngaihtuah tlan ni se a duh thu a sawi.

Assam-in National Register of Citizens (NRC) list an tihchhuah hnuah NRC-a chuang lote Mizorama an luh lohna atan NRC-a chuang lote chu ILP pek loh tur tih thupek chhuah a nih thu sawiin Lalcham­liana chuan, "Checkgate-a strict a nih bakah mobile checking ti turte kan ruat a ni. NRC-a chuang lo tan complaint-na hun hawn vang a ni mai thei rin aiin an rawn lang tam lo. Report ka dawn dan chuan, mi 100 tél chu hnawhkîr an ni tawh," a ti.

Home Minister chuan, Mizoram pawhin khua leh tuite chhinchhiahna tur 'The Mizoram Maintenance of Household Re­gisters Bill, 2019' sorkarin a duan thu sawiin, "Vanduaithlak takin Governor-in min remtihpui thei lo a, President hnenah a thawn a ni. Khua leh tuite chhinchhiahna tur, kan inhumhimna turah Governor-in harsatna min siamsak a ni," a ti a; Bill chu engtika hman theih nge a nih dawn tih leh, a thi mai dawn em tih hriat theih a nih loh thu a sawi.

Lalchamliana chuan ILP chungchang sawiin, "ILP hi dan hnuai aṭanga pek chhuah ṭhin a ni a, a sponsor-tu Mizote ngei pawhin kan sponsor-te kan ngaihtuahzui ngai lo a, hna dang thawkin an vâk kual mai mai ṭhin ni âwm tak a ni. VC leh LC-te pawhin an lo recommend hma mah mah a ni mai thei a, kan vaia kan mawhphurhna a ni tih hriain ṭan i la tlang ang u. Checkgate-ah ILP computerise vek tum a ni a, dan mumal leh ṭha zawk kan siam mek," a ti.

Zokhawthar leh Cham­phai velah sum­dawngte'n harsatna an tâwk tih sor­karin a hriat thu sawiin HM Chama chuan, "Assam Riffles-te'n Burma lama leiṭha (fertilizer) lut tur leh Mizorama lo chhuk tur kuhva ro an dang a ni. Boundary hi Ministry of Home Affairs hnuaia awm a ni a, hman ní thil thleng pawh ka zawt a, Central aṭanga specific order an hmuh thu an sawi," a ti a; sumdawngte'n harsatna an tawh lohna atan sorkarin hma a lak reng thu a sawi. Home Minister hian Capt. Rohlua lehkhabu ziah, 'Mizoram Hnam Movement Sorkarah' tih a tlangzarh a ni.