KHAWTHLIR

Nimin khan Tlangnuam Branch KTP chuan blood donation camp an huaihawt a, an member mipa 24 leh hmeichhia pahnihte'n Aizawl Civil Hospital tan thisen unit 26 an pe. Pentecostal Youth Fellowship (NEI) Headquarters pawhin nimin vek khan Aizawl Civil Hospital tan thisen unit 15 an pe a, a petute mipa 12 leh hmeichhia pathum an ni. Mara Thyutlia Py (MTP), Siahatla Branch chuan nimin khan Siaha District Hospital-ah thisen unit 9 an pe bawk.

Guwahati Mizo Students’ Union chuan September 21, 2019 khan Freshers' Day an hmang­a, Mizoram Lok Sabha MP C Lalrosanga'n a hmanpui. MP chuan, zirlaite chu taima taka zir a, thil ṭha ti tur a siam an ni tih hre renga mahni ṭánghma chauh hâi lo a, ram leh hnam ṭhatna tura thil ṭha tihna kawng zawh turin a chah.

Mizoram sorkar chuan thuchhuah siamin, Mizoramah vawk pûl hri, African Swine Fever a luh lohna tura inven nan Mizoram ṭhenawm ram leh state dang aṭangin dan loa vawk lak luh khap tlat a nih thu a puang. Khapna hi Mizoram sorkara Council of Ministers meeting rèl anga chhuah a ni.

PRISM party chuan thuchhuah siamin, Tripura-a Bru awmte'n duhsakna uchuak tak dawnga Mizorama vote an thlak ṭhin duh lo a, Election Commission of India khin duhte zawnna atana Signature Campaign an kalpui mek chu ngawrh lehzuala kalpui an tum thu an pûang a, "Aizawl bakah district dangah pawh kalpui ni se," an ti. 

Mizoram State Legal Services Authority (MSLSA) lehkhabu buatsaih 'Khawvar' tih leh film 'Ralkhel dar' tih, dan lam kaihhnawih ve vete chu nimin khan Law & Judicial minister TJ Lalnuntluanga'n Mizoram Law College-ah a tlangzarh. Minister chuan, Mizo mipuite'n dan an hriat theihna tura MSLSA hmalakna fakawm a tih thu sawiin, "Sorkar inrêlbawlnaah Law department kaltlang lo chuan dan leh a khaih­hnawih dangte siam a ni ngai lo," a ti.