Bag siam turin MPCB-ah License neih a ngai - MPCB

Mizoram Pollution Control Board (MPCB) hotute chuan, Aizawla plastic bag (polythene) hman phal chin (micron 50 aia chhah) siam chhuaktute leh hmanraw dang hmanga polythene ang chi ip (bag) siamte'n Pollution Control Board (PCB) aṭangin phalna an neih a ngaih thu an sawi. Bag ṭawih thei siama insawi, dik si lo 12 chu Central PCB-in Mizoram PCB-ah a hriat­tir thu an sawi bawk.

MPCB member secretary C Lalduhawma chuan, Aizawl Municipal Corporation (AMC)-in Aizawla plastic bag micron 50 aia hniam hman an phal loh chu a thlakna tur emaw, polythene bag hman phal chin emaw siamtute'n PCB license an nei tur a nih thu leh, Myanmar aṭanga lak luhte chu license nei lo vek a nih avangin man theih vek a nih thu a sawi.

C Lalduhawma chuan, National Green Tribunal (NGT) thu ang leh Plastic Waste Management Rules 2016-in a sawi anga AMC-in a huam chhunga plastic bag micron 50 aia pan hman a khap hnuah, a thlakna tur bag siamtu industry-te chuan MPCB aṭangin licence an neih a ngaih thu a sawi a, "Bag siamtu industry pahnih - Ecosave Mizoram, Chaltlang Venglai neitu Joseph K Lalmuanpuia leh LT Eco Bag, Cedar Complex, Tuirial Airfield neitu Pi Vanramchhuangi te hnenah phalna pek a ni tawh," a ti.

A ṭawih thei tih ringawt chu pawm a ni lo tih sawiin C Lal­duhawma chuan, "Kan hnen aṭangin phalna an lak a ngai a, an thil siamah PCB license number chhut kai a ngai. Bio-degradable chhinchhiahna pawh a lang tur a ni," a ti a; state danga siam pawh ni se, an awmna PCB license number a lang ngei tur a ni tih a sawi.

MPCB Secretary sawi danin, MPCB hian bag siamtute chu license an pek hmain dan chi hrang hrangin an enfiah hmasa ṭhin a, polythene micron 50 aia pan hman loh tur a tih hnuah chuan industry-te chuan micron 50 aia pan an siam chhuak lo tura ngaih a ni. Bag páwn lamah dân ang thlapa siam a nih leh nih loh a inziak tur a ni a, chumi inziak lo chu a dik lo tihna a ni.

Ministry of Environment, Forest and Climate Change (MoEFCC) chuan March 18, 2016-ah Plastic Waste Management Rules, 2016 a tichhuak a, chumi hnuaiah chuan thil siam chhuaktu, la luttute leh a neitute'n an thil siam an chhinchhiahna te, hman tawh hnu thil danga hman theiha siam dan te, retailer leh street vendor-te mawhphurhnate leh sorkarin hma a lakna tur chi hrang hrang tarlan a ni.

Aizawla plastic tuizem siam­tu industry-te pawhin MPCB aṭangin license an la vek tih sawiin C Lalduhawma chuan, "License pek hmain an siamna hmunhma, an hmanraw hman tur leh an bawlhhlawh paih dan turte kan endik hmasa ṭhin. Industry ho hi pollution clearance pek nan chi li-ah kan ṭhen a, red (highly polluting), orange (moderately polluting), green (least polluting) leh white (non polluting)-ahte kan ṭhen a ni," a ti.

Central PCB chuan tun hnai khan MPCB hnenah lehkha thawnin, India rama plastic industry 12 chu Plastic Waste Management Rules, 2016-a Rule 4(h) anga phalna nei lo an ni tih a hriattir a; chu'ng company/industry thil siam chhuahte chu Mizoramah hman a nih leh nih loh bawhzui turin MPCB a hriat­tir a ni.

1.    Advance Bio Material Company, Mumbai

2.    Adsum Solution, Ahmadabad

3.    Shri Ram Bioplastic, Kanpur, Uttar Pradesh

4.    Any Packaging, Greater Noida, Uttar Pradesh

5.    Symphony Polymer, Delhi

6.    Biotec Bags Ltd., Chennai

7.    Biogreen, Banglore

8.    Unigreen, Ahmadabad

9.    Trinity Plas Tech, Chennai

10.    Bhavani Plastic, Chennai

11.    Envigreen, Bangalore