Lunglei leh Kolasib-ah Bru lâk lêt dan tur sawiho

Nimin khan Kolasib DC Conference Hall-ah Home department-a additional secretary Lalbiaksangi hoin October ­thlaa Bru lâk lêtna tura inpuahchahna kal mek an sawiho. Nimin vek khan Lunglei DC Conference Hall-a District Level Core Committee ṭhukhawm chuan Lung­lei district-a Bru chhungkaw 364 hruai kîr tura inpuahchah dan an thlirho bawk.

Kolasib-a meeting kaihruaitu Zoengsanga, Kolasib DC chuan, Kolasib district-a Bru hruai kîr chu October 3-ah ṭan tur a nih thu leh October 25, 2019-ah zawh tum a nih thu a sawi a; inpuahchahna hun tlemtê la awm chu hmang ṭangkai a, mahni hmazâwna tih tur awmte felfai taka hlen chhuak turin kal khawmte a chah.

Mizoram Bru, Tripura camp-a awm mek lak lêt tur zingah Kolasib district-a dah tur zat chu chhungkaw 688-a mi 4,225 an ni a; bus 30 leh 407 truck 30 hmanga hruai tur niin, Kolasib district khaw 10-ah dah a ni ang.

Meeting-ah hian, Bru lêtte awmna tura khawtlang hruaitute'n an hmalaknate an sawi a, kawng awlsam zawk leh felfai zawk tura an ngaihah rawtna an thlen bawk. Bru hruai kîr huna an awm lailâwkna tur temporary shelter, staging area, tui leh kawlphetha, ei leh bar chungchangte sawiho a ni a, vawiin aṭang hian hna thawh ṭan theih beisei a ni.

Lungleia meeting-ah chuan Lunglei DC K Lalrinzuali'n a kaihruai a, Lunglei SP C Lalthanmawia leh a kaihhnawih sorkar department hotute bakah, YMA sub-headquarters, Lunglei hruaitute an tel. Bawrhsap chuan, Bru hruai kîrnaa mawhphurhna nei zawng zawngte chu ṭha taka an mawhphurhnate hlen tum turin a chah.

Meeting-ah hian, Bru chhungkuate Lunglei district-a an awmna tur khaw pali - Dinthar, Bûknuam, Putlungasih leh Chawilung South-a administrative officer (AO) ṭheuhte'n an inpuahchah dan an sawi a; Bru-te awm lailâwkna (temporary shelter) hmun tur tihfel a nih tawh thu te, transportation, ei leh bar, kawlphetha leh tui, kawng dinhmun vemhimna lamte sawifiah a ni bawk.

Lunglei district-ah hian Bru chhung­kaw 364-a mi 2,051 awm tura ruahman a ni a; chu'ngte chu Khak­changpara aṭangin chhungkaw 3, Hamsapara aṭangin chhungkaw 2, Naisingpara aṭangin chhungkaw 54 leh Haza­cherra aṭangin chhungkaw 305 an ni. Chhungkaw 364-te chu Putlungasihah chhungkaw 121, Chawilung South-ah chhungkaw 43, Dintharah chhungkaw 187 leh Bûknuam­ah chhungkaw 13 dah tura tih a ni.

Lunglei district-a awm tur Bru lak lêt hna hi thawh ngaa neih tum a ni a; thawh khatna chu October 3-ah ṭan tum niin, Naisingpara camp-a awmte hruai tura ruahman a ni a, bus 19 leh lirthei dang eng emaw zat ruahman a ni.