Dy.CM-in hall tur lungphùm a phúm

Ramthar Veng, Aizawla Multipurpose Community Hall thar sak tur lungphùm chu deputy chief minister Tawnluia, Urban Development & Poverty Alleviation department enkawltuin nimin khan a phúm.

Tawnluia chuan, sor­kar hmalakna hrang hrang hlawhtling taka kalpui a nih theih nan tlawmngai pawl leh khawtlang hruaitute ṭawiawmna a pawimawh thu a sawi a, "Multipurpose Community Hall sak tur hi a nih tur ang taka sak a nih theih nan department lama thawktute bakah, khawtlang hruaitute'n a ṭul anga an enpuia an vilpui a ngai a ni," a ti a; hall chu veng bil ta ni loin, Mizo mipuite'n ṭangkai taka an hman tlân theih nan enkawl tur a nih thu a sawi.

Deputy Chief Minister chuan, Aizawl Muni­cipal Corporation hnuaia hmalakna hrang hrangte tarlangin, AMC hnuaia hna 98 hnawhkhahna tur te, multi level car parking sak mek te, city centre sakna atana hmalaknate a sawi a; AMC-in chak zawka hna a thawh theih nan Mizoram Municipal Common Cadre Service Rules leh Mizoram Municipal Subordinate Service Rules duan a nih thu a sawi bawk.

Hall lungphùm phùmna inkhawmah hian MLA pahnih - Mizoram Youth Commission chairman Dr Vanlalṭanpuia leh C Lalmuanpuia te, AMC mayor PC Lalhmingthanga, UDPA secretary Dr C Vanlalramsanga, sorkar hotu dangte leh Ramthar Veng khawtlang hruaitute an tel. Multipurpose Community Hall hi cheng nuai 500 sênga sak tur a ni a, a satu tur chu Torel Consultancy, Tlangnuam West an ni.