Zenghri danna beihpui thlâk ṭan a ni Mi 1,14,009 hnenah hri danna pek tum
Nimin khan Mizoram pumah National Immu-nisation Day hman niin, naupang kum 5 hnuai lamte hnenah zenghri danna (pulse polio) pek ṭan a ni a; tun ṭumah hian state pumah nautê/naupang 1,14,009 pek tum a ni.
National Immunisation Day hawnna inkhawm hi Aizawlah chuan zing 9:30-ah Health & Welness Centre, Chaltlangah neih a ni a, Health & Family Welfare secretary H Lalengmawia'n a hawng. District tinah hawn ve nghal a ni bawk.
Hawnna inkhawm hi National Health Mission (NHM) mission director Dr Eric Zomawia'n a kaihruai a; H Lalengmawia chuan, mihring nuna thil hlu tak chu hriselna a ni tih sawiin, "Kan damna atan mi tinte'n lo nghak tawp loin, tih ve tur kan nei, kan tih ve tur chu thuawih taka mithiamte thusawi zawm te, kan nunphung atana ṭha Pathian thuin a sawi zawmte hi a ni. Rinna a hran deuh vanga hri laka invênna la lote kan la awm a, hetianga rin hranna dik lo hi kan bànsan a hun tawh hle a ni," a ti.
Health Secretary chuan, Mizoram sorkarin a thlàwnin hri laka invènna chi 11 a kalpui mek tih sawiin, hri laka invènnate chu a hun taka la vek ṭhin turin mipui a chah a; sorkarin a thlàwna hri danna a pekte chu mahni sum sénga lâk tur ni se chuan, mi tam takin an lâk phak loh tur a nih thu a sawi.
Nau pâi mekte pawh anmahni leh naute himna leh hmasawnna turin a hun taka inentir zat zat a ngai tih sawiin HFW Secretary chuan, "Kohhrante'n fa neih tam a, chanchin ṭha hril rawngbawl hna chak zawk leh zau zawka kalpui a nih theih nantea hma an lâknate tihlawhtling tur chuan nu hrisel, fa hrisel kan neih a ngai a ni," a ti.
Dr Eric Zomawia chuan, zenghri danna pek chu India ramah December 1995-ah ṭan a nih thu a sawi a; tun ṭuma vaccine pek tawh naupang kum 5 hnuai lam neite chu lâktir vek turin nu leh pate leh naupang chhungte a chah.
State Immunisation officer Dr Lalzawmi tarlan danin, zenghri beihpui thlâk hi India ram pumah January 31 khan neih tur a ni a, Pathianni a nih avangin Mizoramah chuan sorkar laipui remtih angin nimin khan pek ṭan a ni. Zenghri laka invênna damdawi hi lâk tawh a awm lo a, nautê/ naupang kum 5 chin hnuai lam, a hmaa lo la tawhte pawhin lak vek tur a ni.
Kum 2020 khan zenghri pek leh lâkah Mizoramin target a neih chu khûmin, pek tur zat ruahman aia tam an pe a, 103% an pe a ni. Tun ṭumah hian naupang kum 5 hnuai lam mi 1,14,009 pek tum a ni a, chuta tan chuan team 861 siam a nih bakah, pekna hmun (booth) 1,351 siam a ni.