Zu zuarte'n Mizoram sorkar an khing Court-in insawifiah turin hriattir

Mizoram sorkara dan, The Mizoram Liquor (Prohibition and Control) Act hnuaia zu zuarte'n Gauhati High Court, Aizawl Bench-a Mizoram sorkar an khinna chu nimin khan ngaihtuah a ni a, Mizoram sorkar chu ni li chhunga insawifiahna thehlut tura tih a ni.

Zu zuarte ukilte hnen aṭanga thu dawn danin, sorkar ukilte chuan insawifiahna hun pek belh tura an dil ang, High Court chuan ni li chhung (January 25 thleng) insawifiahna thehluhna hun a pe a; sorkarin insawifiahna a thehluh hnu, January 29, 2019-ah thubuai hi High Court chuan a ngaihtuah chhunzawm ang.

Zu zuarte ukil ṭan chhan ber chu - zu zuar mekte hian zu zawrh phalna March 2019 thleng an nei a, zu lak khawl sa a la tam si a, March 10 thleng dry day puan a nih chuan an zu neih sa an hralh zo hman dawn lo a ni. Chu vang chuan March 10, 2019 thlenga dry day an puan chu sût emaw, tihtawi emaw an duh a ni.

Thubuai chungchang ngaih­tuahna hmasa, January 17, 2019-ah pawh khan Mizoram sorkar ukilte chuan insawifiahna hun atana hun pe turin High Court an dil a, Court chuan phalsakin, nimin khan thubuai a ngaihtuah leh a ni.