Zirlai naupangte'n páwl an sawnna atan Bridge course buatsaih a ni dawn - School Education Minister

School Education minister Lalchhandama Ralte chuan, zirlai naupangte páwl sawnna atan bridge course buatsaih a nih dawn thu a sawi.

Lalchhandama Ralte hian nimin khan a bial, Tuivawl constituency chhunga khaw ṭhenkhat a tlawh a, khaw­tlang hruaitute nen an inkawm­naah thu sawiin, "Khawtlang hmasawnna atan zirna a pawimawh ber. Kumin acade­mic session-ah sikul hawn theih loh chhung a rei avangin naupangte páwl sawn nan bridge course buatsaih a ni dawn a, printing press-ah chhut mek a ni. Khawvel hmasawnna hmu phâk turin nula tlangval chher hriam a, zirna ngaih pawimawh a ṭul," a ti.

Sorkar term kal laiah Covid-19 léng leh inthlan kaihhnawih avangin hna thawh theihna hun a tlem nia sawiin Lalchhandama chuan, "Sorkarin hmachhawp a neih lâwkte chu thawh zel a ni. Covid-19 avangin India ram pumin sum leh páiah harsatna a tâwk a ni," a ti a; hri léngin ziaawm lam a pan avangin hmasawnna hnathawhte a pangngaia a kal thuai beisei a nih thu a sawi.

Lalchhandama Ralte chuan, ramin harsatna a tawh laiin sorkarin mipui mamawh zualpui bikte chu ngaih pawimawhah a nei rih tih sawiin, "Khaw ṭhen­khatin ṭhál laia tuia harsatna an neihte sutkian dan kawng zawn a ni," a ti.

Tuivawl Bialtu MLA chuan, Sinlung Hills Council chhung hmasawnna tur sorkarin a thawk mek nia sawiin, "He lai hmun tihhmasawnna atan hian zirtirtu ṭhahnem tak dah belh a ni a, Manipur nena inkal pawhna kawngpui cheng nuai sang têl man thawh mek a ni," a ti a; Bagha nena inkal pawhna tur pawh enfiah mek a nih thu a sawi.