AMC-a sum enkawl kawngah MNF a hlawhchham - ZPM

Zoram People Move-ment (ZPM) general secretary-te chuan Aizawl Municipal Corporation (AMC) term liam taa MNF kaihhruai sorkar chu sum enkawl kawngah an hlawhchham thu an sawi a; AMC inthlan awm turah ZPM an tlin chuan AMC kalphung thar an siam tur thu an sawi bawk.

ZPM general secretary (GS)-te chuan nimin khan Aizawl Press Club-ah thuthar thehdarhtute an kâwm a; GS zinga mi Zodinsanga chuan, kum 10 chhunga AMC kalphung chu a nih tur ang a nih loh thu sawiin, "73rd & 74th Constitutional Amendment-in muni-cipalities kal dan tur a ruahman ang hi AMC hian a la pha lo nasa hle. State sorkarin an thuneihna leh mawhphurhna an sem zâi duh loh avangin tun thlengin a nih dan tur a la pha lo a ni," a ti. 

Congress leh MNF kaih-hruai AMC chu angkhat reng an nih thu sawiin Zodinsanga chuan, "An tih theih tâwk chu tuna kan dinhmun hi a ni a, hei bak hi hmasawnna tur an nei tawh lo," a ti a; AMC chu ṭha leh chak zawka hna thawk thei turin ZPM-in an siam dawn thu a sawi.

ZPM GS-te tarlan danin, AMC inrêlbàwlna (administration)-a sum hman chu AMC sorkar hmasaa kum tàwpna 2015-16 ah Rs. 2,15,24,172 a ni a, MNF kaihhruai AMC sorkarin kum 2019-20-a administration atana sum an hman chu Rs. 12,21,86,874 a ni. Kum 2015-16-a sum hman aṭanga kum 2019-20-a a punna chu 467.67% a ni.

MNF kaihhruai AMC sorkarin sum a enkawl dan chu siamṭhat ngai tam tak a awm thu sawiin Zodinsanga chuan, "Financial discipline a awm lo. Tun hnaiah an inrêlbàwlna senso a sang chho lutuk hi siamṭhat vat a nih loh chuan Mizoram sorkar kalphung ang thoin, nakin lawkah hmasawnna hna thawhna tur awm mumal lo khawpin inrêlbàwlna leh hlawhah a la kal ral thuai dawn a ni," a ti a; inrêlbàwlna leh thil ṭul loa sum chhuak nasa lutuk chu 50%-a tihhniam theih a nih an rin thu a sawi bawk.