KHAWTHLIR

Rajya Sabha MP K Vanlalvena chuan kum 2021-2024 chhunga Mantri’s SAGY Scheme hnuaia model village atan khaw pali a thlang a; chu'ngte chu - N Mualcheng, Serchhip district, Ratu, Aizawl district, Pángkhua, Lawngtlai district leh Phúrà, Siaha district-te a ni.

Legal Metrology chuan meizial (cigarette) tawlhrûk chungchangah thuchhuahin, Mizoram ramri leh a chhehvel aṭanga dan loa meizial lâk luh leh zawrh khap tlat a nih thu an tarlang. Dan loa ram dang aṭanga meizial lâk luh chu Legal Metrology (Packaged Commodities) Rules, 2020 hnuaiah khap a ni.

Kolasib District Magistrate chuan silai license chungchangah thuchhuah a siam a; Arms Act, 1959 Section 3(2)-in mimal tan silai license pathum kawl a phal ṭhin chu Arms (Amendment) Act, 2019 hmangin pahnihah tihhniam a nih thu a tarlang a, silai license pahnih aia tam neite chu February 13, 2021 ral hmain an kawl theih chin bak District Magistrate Office-ah thehlut turin a hriattir.

Kolasib DC chuan, state páwn Mizorama lut driver-te chu Rapid Antigen Test hmangin swab sample endiksak tawh loh tur a nih thu a tarlang a; passenger-te erawh chu RAT hmanga sample endik chhunzawm zel tur a ni ang. RAT hi Bairabi, Phaisen, Saiphai screening post-ahte kalpui tur a ni.

State Referral Hospital-ah nimin khan Covid-19 vei mi pakhat dah luh a ni a, ani nen mi pakua an awm mek. SRH-ZMC Bulletin tarlan danin, mi pakua zinga pakhat chu ICU-ah enkawl chhunzawm zel niin, nimin aṭang khan ventilator hmantir a ni a, mi dang zawng Isolation ward-ah awmin, an zinga pakhat chu oxygen pek mek a ni. SRH-a Covid-19 vei vanga enkawl mek zingah hian kum 60 chung lam leh naupang pakhat ve ve an tel