COVID-19: Mizoram dinhmun Chhuahtir tawh zat - 99.11%

February 1, Thawh­ṭanni khan Mizoramah Covid-19 vei mi pakhat hmuh chhuah a ni a, nimin khan hripui laka fihlîm tawh mi pakhat chhuahtir a ni. Nimin tlai dar 5 thleng khan hripui vei hmuh tawh mi 4,373 zinga mi 4,334 (99.11%) chhuahtir an ni tawh.

Mizorama Covid-19 vei hmuh chhuah tawh chu mi 4,373 an ni a, mipa 3,198 leh hmeichhia 1,175 an ni. Nimin tlai dar 5 thleng khan mi 4,334 (99.11%) chhuahtir an ni tawh a, mi pakua (0.21%) thi tawhin, enkawl mek mi 30 (0.68%) an awm.

Covid-19 vei Thawh­ṭannia hmuh chhuah chu Rapid Antigen Test hmanga Aizawla hmuh a ni a; Zarkawta hmeichhia kum 19, sikul luh dawn vanga swab sample endiktir niin, hri a kàina hriat a ni lo a, Covid-19 symptom a nei lo. ZMC laboratory leh TrueNAT-PCR hmanga sample endik zingah hripui vei an awm lo.

Nimina tlai dar 5 thlenga Covid-19 laka fihlîm tawh mi pakhat chhuahtir chu Siaha CCC aṭanga chhuahtir a ni.

Thawhṭanni khan ZMC laboratory-ah RT-PCR hmangin swab sample 423, TrueNAT-PCR hmangin district parukah sample 91 leh RAT hmangin district pasarihah sample 720 endik a ni a; sample endik zawng zawng chu 1,234 niin, chu'ng aṭanga Covid-19 positive hmuh mi pakhat chu 0.08% a ni. 

February 1, 2021 thlenga Mizorama swab sample endik tawh zat chu 2,08,893 a ni a, chu'ng aṭanga Covid-19 positive mi 4,373 chu 2.09% a ni. Hripui vei hmuh tawh zinga mi 2,070 chu Mizoram chhunga kái an ni a, mi 2,303 chu Mizoram páwn aṭanga an rawn luh hnua hmuh chhuah an ni thung.

Mizorama district 11 zinga district paruk - Siaha, Champhai, Serchhip, Mamit, Saitual leh Khawzawl district-ahte Covid-19 vei an awm tawh rih lo a; Lawngtlai leh Hnahthial district-ahte pawh pakhat ve ve chiah an awm tawh a ni.