AMC bye-election buatsaih turin SEC-in sorkarah rawtna a thlen

Aizawl Municipal Corporation (AMC)-a councillor pahnihte chu MLA atan thlan tlin an nih avangin an awmna ward pathum chu a ruak mek a, chu'ng ward pathumah chuan bye-election neih a nih theihna atan Mizoram State Election Commission (SEC) chuan Mizoram sorkarah rawtna a thlen.

Vanglaini palai zawhna chhangin, SEC hotute chuan AMC-a bye-election buatsaih tur hian dan en ṭhat ngai a awm tih an sawi a, "Bye-election neih chungchang hi danah chiang takin a awm lo a, chuvangin, bye-election nei tur chuan dan siamṭhat ngai a awm a, chumi tur chuan sorkarah rawtna kan thlen mek a ni. Bye-election chu buatsaih theih ngei kan duh," an ti.

Hetih lai hian, MLA term zo ta (state assembly pasarihna)-ah khan AMC councillor ni lai Lalthanliana chu Aizawl North-II MLA atana thlan tlin ni mah se, a ward-ah bye-election buatsaih a ni lo.

Nikuma MLA inthlan neih zawh tâkah khan AMC councillor ni lai mi panga chu candidate an ni a, chu'ng zinga pahnih C Lalsawivunga (ZPM) leh C Lalmuanpuia te (MNF) chu MLA thlan tlin an ni.

C Lalmuanpuia chu Ward-VI (Chanmari West, Hunthar Veng, Edenthar Veng) aṭanga thlan tlin a ni a, C Lalsawivunga chu Ward-XVI (Bethlehem Veng, Bethlehem Vengthlang leh College Veng) aṭanga thlan tlin a ni thung.

Kum 2015-a AMC inthlanah khan MNF-in councillor 11 neiin sorkarna an siam a, Congress party-in councillor pasarih neiin, MPC-in councillor pakhat an nei a ni.

Hetih lai hian, SEC chuan MLA inthlan neih zawh taka LADC-a MDC ni lai H Lalbiakzauva bial chhuahsanah bye-election an buatsaih dawn. LADC dan ang chuan, bial chhuahsan a nih aṭanga thla ruk chhungin bye-election buatsaih tur a ni.