Tut luia dan kalha sangha bomb-tute Hum tumah MPCC-in sorkar an puh

Congress party chuan, November 21, 2020-a Phaizau khawtlangin Tut lui an humhalh chhunga bomb hmanga sangha mantu Mamit bialtu MLA H Lalzirliana leh MNF party hruaitute lakah FIR thehluh a ni tawh chungin, tun thlengin action lâk a la nih loh thu an tarlang a; dan kalha sangha mantute humah MNF sorkar an puh.

Nimina Congress party thuchhuah tarlan danin, bomb hmanga sangha man chungchangah hian MPCC-in December 9, 2020-ah thuchhuah siamin, thil sual titute chu dan hmanga hrem ngei an phût thu an tarlang. December 11, 2020-ah Vanramchhuangi, Chaltlangin Mamit Police Station-ah FIR a thehlut bawk.

MLA H Lalzirliana leh a thurualpuite'n sangha an bomb chungchangah Mamit PS-ah IPC 341 leh 429 bakah, Explosive Act Section 3 leh 5 tlawhchhanin thubuai ziah luh a ni a; case no. chu C/No 64/2020 dt 15/12/2010 a ni.

MPCC chuan, hremna na tak tuar tura thubuai ziah luh ni si, tun thlenga hmalakna leh hremna a la awm lo chu mipui tan hriatthiam theih a ni lo tih sawiin, "Fisheries minister Pu K Lalrinliana’n Mamit Fisheries Development Officer-in a tìr aṭanga a bawhzui thu a sawi laia hmalakna a la awm si lo hi mak kan ti a, MNF sorkarna hnuaiah police kut phuar a ni leh ta em ni tih kan zawt a ni," an ti.

Dan bawhchhiaa sangha bomb-tu H Lalzirliana, MLA leh a thurualpui MNF hruaitute chu a rang thei ang bera hrem turin MPCC chuan Mizoram sorkar an hriattir nawn leh tih sawiin, "Hremna lekkawh thuai a nih loh chuan a ṭul anga hmalak kan tum a ni tih Mizoram sorkar kan hriattir a ni," an ti. Dan bawhchhetute, an dan bawhchhiat finfiahna awm thlapte pawh MNF sorkarin hum a tum tlat a nih chuan inthlannaah mipui thlàwpna an beisei ngam tawh lo tura an ngaih thu an sawi bawk.