'Kohhran hi kan unit a ni' tih sawina hun leh hmun sawi chiang turin phût

ZPM leader Lalduh­oma chuan, party dangte'n ZPM chu 'Kohhran hi kan unit a ni' tia sawia an puh ṭhin chungchangah, 'Kohhran hi kan unit a ni' tih an sawina hmun leh sawi hunte sawi chiang law law turin political party dangte a phût.

Lalduhoma hian February 1, Thawhṭanni zana Hlimen YMA Hall-a thu a sawinaah, "Tun hnaiah AMC-a kan elpui ber tur MNF-te'n nasa takin min bei a, an hotute hmun hrang hrangah kal kualin ZPM leh keima mimal beih chu hna berah an nei. Kan ngawi reng a, kan dawh zel a ni," a ti a; tun hnaiah pawh MNF hotute'n ZPM chu 'Kohhran hi kan unit a ni' tia sawiah an kalna hmun hrang hrangah an sawi leh thu a sawi.

ZPM Leader chuan, ZPM vice president K Sapdanga’n a sawifiah hnuah pawh duh tâwk mai loin party dang hotute'n an la sawi lui zel tih sawiin, "Vawiin thlenga an hotupa berin a sawi leh tâkah chuan, hetiang thu hi khawiah nge kan sawi tih ka zawt duh a ni. A finfiahna, kan sawi leh ziakte a nei a nih chuan rawn phawrh turin ka phût a, a nei lo a nih chuan tun hnuah sawi tawh lo turin ka chah a ni," a ti.