Aizawl Convention sakna tur Cheng nuai 4899 pawm a ni

New Delhi-a cham mek Tourism leh Sports changtu minister Robert Romawia Royte chuan nimin khan Tourism Ministry a dawr a, Aizawl Convention sakna tur cheng nuai 4899 pawm a nih thu an lo hrilh.

Tourism Ministry chuan Aizawl Convention atana Approval Board Meeting Minutes leh Administrative Approval chu Robert Romawia hi lo hlanin, ni 5 chhungin sum pawh 1st instalment release hman an inrin thu an lo hrilh. Sum release veleh hnathawh ṭan tur a ni.

Nimin vek khan Robert Romawia hian Union Sports minister Kiren Rijiju hmuin sports leh ṭhalaite hmasawnna tur tam tak an sawi dun. Union Minister hian Robert Romawia sawm angin Kolasib Saidan venga football astroturf ground sak zawh thar chu a hawng dawn a ni.

Sports Minister hian Sports secretary Ravi Mittal pawh kawmin Tata Trust-te'n sum mamawh zat an neih daih loh avangin Zoram High Altitude Training Centre rawtna awm mek chu a kal zel hlei thei lo nia sawiin, cheng nuai 1500 tal thawh ve turin a ngen. Union Secretary chuan Tata Trusts lamin cheng nuai 1500 an thawh theih chuan NSD fund aṭanga cheng nuai 1500 an sanction ve tur thu a hrilh.

Sports Minister hian chief minister Zoramthanga chah angin Ministry of Road Transport & Highways pawh tlawhin Tripura nena inkalpawhna ṭha siam zawhna atan hmabak Chhimluang to Vanghmun atana sanction tifel rang turin a ngen.