Zira'n DAO leh FOCUS pisa a hawng

Saitual district-a district agriculture office (DAO) leh FOCUS office chu nimin khan minister R Lalzirliana'n a hawng. FOCUS bul ṭanna tur hawnna hun chu Keifang Venghlun Branch YMA Zawlbûka neih a hmanpui nghal bawk.

R Lalzirliana chuan, district thar thuam leh chei chu vawi leh khata tih theih a ni lo chungin hripui léng karah a theih ang angin sorkarin a tuamhlâwm tih a sawi a, "Hengahte hian mipuiin lawm nacháng kan hriat a pawimawh hle. Kum khat âwrh chhungin district DUDO office, DEO, Samagra office leh DHO hawn a ni. DC complex sakna tur sumte chu dahin a lung pawh phûm a ni," a ti.

Minister chuan, Saitual district-ah FOCUS hawn a ni ta chu lawmawm a tih thu sawiin, district mipuite chu Mizoramah project tihlawhtlingtu ni ngei turin a fuih a ni.

Inkhawmah hian MLA L Thangmawia, Agriculture secretary Lalhmingthanga, Saitual DC VL Hruaizela Khiangte leh FOCUS state project director RK Nithanga te pawhin thu an sawi.

FOCUS hi United Nations péng pakhat International Fund for Agriculture Development sum aṭanga ruahman a ni a, Mizoram leh Nagaland-ah kalpui mek a ni. Mizoramah chuan March 2019-ah bul ṭan a ni a, district pali - Champhai, Kolasib, Serchhip leh Mamit-a khaw 272-ah hmalak mek a ni.