AMC inthlan atan political party-te an campaign

Political party hrang hrangte chu February 16, 2021-a Aizawl Municipal Corporation (AMC) inthlan atan ngawrh takin an campaign mek zel a; MLA-te leh party-a hruaitu liante'n hmun hrang hrangah campaign an nei ṭhin.

Congress party chuan nimin khan Chawnpui Vengah AMC inthlan atana campaign hawnna inkhawm an buatsaih a, hun hmanpuitu MPCC treasurer Zodintluanga Ralte, MLA chuan, MNF sorkar chu pawisa chiah duhah a puh.

Zodintluanga Ralte chuan, MNF sorkar chu pawisa chiah duh, mipui hmasawnna, khawpui nuam leh chên hahdam neih erawh duh si lo niin a sawi a, "An kalna apianga an thusawi danglam, mahni leh mahni inhnialna thu sawi ṭhin an ni. AMC-ah ruling party thlan loh avanga harsatna thleng tur anga invau hi Pathian remtih zawng a ni lo," a ti.

Kum 2008-ah Congress party a sorkar ṭan aṭangin Aizawl chu khawpui thianghlim leh chênna hmun nuam a nih theih nan khawpui chhunga garage trailer ṭawp lutuk chu thenfai a nih thu sawiin MPCC Treasurer chuan, "Municipal kan neih hnuah an kutah hlan niin, khawpui a fai chho ta a ni," a ti a; MNF kutah AMC a awm aṭangin bawlhhlawh paih dan a mumal lo leh tâ niin a sawi.

Zodintluanga Ralte chuan, Aizawl khawpui veng tam takah an party candidate-te'n mite duhsak rawn an hlawh em em zel niin a sawi a, "Hei hi Pathian remruatna felzia Congress-ah a lang a ni," a ti.

MNF senior vice president Tawnluia chuan nimin khan Republic Veng community hall-ah AMC Ward-XVII campaign-ah thu sawiin, khawpui bawlhhlawh paih dan chu táwngpáwng sawisel a, mipui bum tuma vote zawnna atana hman chi a ni lo tih a sawi.

Tawnluia chuan, "Congress sorkar khan kum 2016-ah khan Solid Waste Management Centre siam an ṭan tawh a, April 2021 aṭang chuan dan zawm loh chuan thla tin sum tam tak sorkarin a chawina tur dan India ram pumah siam a ni a, bawlhhlawh sâwngbàwl hi tihmakmawh a ni ta. Bawlhhlawh sâwngbàwl dan kan inzirtir zel a, dan kenkawh tumin hma kan la zel a ni," a ti.

AMC-ah eng party pawh sorkar se, bawlhhlawh senghawi dan tura India ram puma duan chu kalpui ngei ngei a ngai tih sawiin Tawnluia chuan, "Bawlhhlawh paih dan hi táwngpáwng sawisel a, mipui bum tuma vote zawnna záwnga hman chi a ni lo," a ti a; mipui tlin tâwk zelin dan chhungah bawlhhlawh paih dan kalpui zel tum a nih thu a sawi.

MNF vice president Dr R Lalthangliana pawhin nimin khan Muanna Veng community hall-ah campaign-in hun a hmang a, "AMC sorkar danglam tak leh thil ti thei, hna thawk ṭha tak kan siam ang," a ti.

Dr R Lalthangliana chuan, AMC chu MNF din leh kutchhuak a nih thu leh a enkawltu tur UDPA pawh MNF sorkar din a nih thu sawiin, "Tun ṭumah MNF-in sorkarna kan siam leh ngei ang a, AMC sorkar danglam tak, thil ti thei leh hna thawk ṭha tak kan siam dawn a ni," a ti a; AMC chu Congress sorkar din a nih loh avangin Congress party-in AMC kalpui dan an hre lo niin a sawi.

MNF ṭhalaite pawhin nimin khan AMC inthlan atana campaign-na 'Sikpui fehchhuah' an buatsaih ṭan a; nimin zing khan Khatla kâwnah hun hmangin, MNYF president Lalrinawma, leh MNF adviser Lalruatkima ten an hmanpui a ni.

ZPM leader Lalduhoma chuan, AMC-ah ZPM party-in sorkarna an chan chuan Aizawl khawpuia bawlhhlawhte chu chi hnih - ṭawih thei leh ṭawih thei loah chiah mipuiin an thliar theihna turin an kalpui dawn tih a sawi.

February 1, Thawhṭanni zana Hlimen YMA Hall-a AMC Ward-19 campaign bul an ṭannaah Lalduhoma chuan, "AMC-ah ZPM-in sorkarna kan chan chuan mipui tana bawlhhlawh paih dan awlsam zawk kan ruahman dawn. Bawlhhlawh chi hnih - ṭawih thei leh ṭawih thei loah chauh thliar tawhin, a bak zawng chu in chhung piah lamah awmze neiin mipui tana phurrit lo turin kan thliar hrang ang a, in chhungah bawlhhlawh báwm pahnih bâk hûn a ngai lo ang," a ti.

Lalduhoma chuan, "Bawlhhlawh paih motor-in a thlen phâk lohnaa awm, bawlhhlawh paih man cháwi ve site bawlhhlawh paih theih dan tur kan ruahman nghal ang a, ruahmanna kan siam chhung chuan bawlhhlawh paih man an chawi lo ang," a ti a; bawlhhlawh motor thlen theih lohna hmuna awmte harsatna leh phurrit sutkian an tum thu a sawi.

ZPM Leader chuan, MNF campaign auhla ber, 'State-a rorel laite thawhpui theih tur AMC sorkar siam' tih chu mipui bum tumna a nih thu sawiin, "AMC hi direct funding, Delhi aṭanga budget an rawn siamsak, mahnia inrêlbâwl a ni a, heti laia ruling leh ruling lo hian awmzia a nei lo. Mizoram sorkar hi post office ang deuh a ni a, AMC sum lo kal hi state sorkarah a thleng a, state sorkar chuan AMC kuta hlan chhâwn kha a lo tih ve mai tur a ni. Ni rei tak hrensak theihna a nei lo," a ti.

ZPM vice president Lalthansanga pawhin February 1, Thawhṭanni khan Hlimen YMA Hall-ah vêk vantlang inkhawmah thu a sawi a, ZPM chu Zoram thlaphâng chhan chhuak tura piang a nih thu a sawi.

Lalthansanga chuan, "ZPM hi Zoram thlaphâng chhan chhuak tura lo piang a ni a, Pathian leh mipui zara sorkarna a chang a nih chuan Pathian ram lenna tur ministry kan din dawn a, thlarau thianghlim nen ram rawng kan báwl dawn a ni," a ti.