High Court hran nei turin theihtawp Kan chhuah dawn - Law Minister

Law & Judicial minister TJ Lalnuntluanga chuan, Mizoramin Gauhati High Court (GHC) hnuaia bet reng loa high court hran a neih ve theihna atan theihtawp chhuah a nih dawn thu a sawi.

TJ Lalnuntluanga hian nimin khan Gauhati High Court, Aizawl Bench a tlawh a, judge Justice Nelson Sailo leh thawktu dangte'n an lo dawngsawng.

High Court complex-ah hmasawnna hna thawh hrangte an tlawh a, High Court-in a mamawhte leh tihchangtlun zel dawn tur a enfiah a ni.

Law & Judicial Minister chuan, Mizoramin High Court hranpa a neih theihna atan theih­tawp chhuah zel a nih tur thu sawiin, "High Court hranpa nei tur hian building leh thawktu lam tihchangtlun hmasak a ngai a, chuvangin High Court hmunhma pawh hi tlawh kan ni," a ti.

Judiciary dah hran (separation of judiciary) chu MNF sor­kar hmasak laia tihpuitlin a nih thu sawiin TJ Lalnuntluanga chuan, "Mizoram sorkar chuan Court hi a ngai pawimawh a ni," a ti a; Mizorama Court-te tichangtlung turin theihtawp chhuah zel a nih tur thu a sawi.

Law Minister chuan, Court chu mipuite'n nu leh pa anga ena an zualkona ber tur a nih thu sawiin, "A thawktute pawh lungawi taka an thawh theih a ngai. Chumi tur atan chuan an hmunhma tihchangtlun a pawimawh a ni," a ti.

TJ Lalnuntluanga hi Law & Judicial secretary Marli Vankung bakah Finance leh Planning department hotute'n an ṭawiawm a ni.