Party pathumin kawngzawh an thláwp MPYCC leh ZPM-te kawng zawh turin inchah

MNF party, Congress party ṭhalaite leh Zoram peoples' Movement (ZPM) ṭhalaite chuan thuchhuah siamin, The Citizenship (Amendment) Bill, 2016 (CAB) duh lohna leh dodalna lantirna atana MZP-in vawiina Mizoram pum­ah kawngzawh an huaihawt tur chu an thlawp thu an tarlang. MPYCC leh ZPM ṭhalaite chuan an member-te chu kawng zawhnaa tel vek turin an ngen.

MNF chuan, MZP-in vawiina kawngzawh an huai­hawt tur chu ṭha an ti a, an thlàwp tlat thu tarlangin, "Zoram himna atana ngaihtuahna sênga pên chhuak ngam ṭhalai kan la nei zel hi thlamuanthlak kan ti tak zet a ni," an ti. CAB chu MNF-in an duh loh tak zet tih sawiin, "Chief minister Pu Zoramthanga hoa Council of Minister meeting-in Rajya Sabha-a CAB pass a nih lohna tura hmalak an rel a. Pu Zoramthanga Delhi-a zin pawhin Prime Minister leh Union Home Minister hnenah Bill ṭha a tih loh thu thlenin a sawipui a ni," an ti a; CAB pass a nih loh nan MNF-in hma an la zel dawn niin an tarlang.

Congress ṭhalai (MPYCC) chuan, Lok Sabha-ah CAB pass a ni chu pawi an ti a, an duh loh tak zet thu leh Bill dodalna tura NESO leh MZP hmalaknate chu chhuanawm an tih thu an sawi a, "Pu Lal Thanhawla kaihhruai sorkarin June 28-29, 2018-a Legislative Assembly session hnuhnung bera CAB duh lohna resolution pass nachang an lo hriate kha a lawmawm a, Rajya Sabha MP Pu Ronald Sapa'n he Bill hi Rajya Sabha-a pass a nih lohna tura theihtawp a chhuah hi chhuan­awm kan ti hle a ni," an ti.

MPYCC chuan, CAB dodalna atana MZP-in total bandh an huaihawt tawh chu ṭha an tih thu leh vawiina kawngzawh an neih tur pawh an thlawp avangin MPYCC member-te chu ṭhahnemngai taka kawng zawhnaa tel tura an inhriattir thu an sawi a; CAB chungchanga NGO Coordination Committee hmalakna chu an thlâwp thu an tarlang bawk.

ZPM ṭhalaite chuan, Mizo ram, hnam leh sakhua a pilbo ngei theihna tura central-a BJP sorkarin CAB hmanga hma an lakna hi Mizoramah a hlawh­tlin an remti ngai dawn lo tih sawiin, "Lu chhum bán chhum huamin CAB hi a tàwp thlengin kan dodal zel dawn a ni," an ti.

Chief minister Zoram­thanga’n CAB dodalna ṭawngkama central sorkar hotute hnena a thlen chu a tâwk zo loa an ngaih thu sawiin ZPM ṭhalai chuan, "Kan ṭhenawm state-te'n ṭawngkam mai ni lo, thil tiha dodalna an lantir ngam ang hian Mizoram CM Pu Zoramthanga hian CAB a duh loa a dodal tak zet a nih chuan thil tihin a tilang ve tur a ni," an ti a; CM Zoramthanga chu BJP nena an inthlunzawmna NEDA aṭangin a rang thei ang bera inhnûkdawk turin an phût nawn a ni.