Ei leh bara intodelh dan tur sawiho

Agriculture minister C Lalrinsanga chuan January 21, Thawhṭanni khan Phairuangkai, Putlunga­sih leh Záwlpui-te a tlawh a; kut hnathawktute chawikan dan tur leh ei leh bara intodelh tura hmalak kawngah kut hnathawktute leh department hotute a kâwm.

C Lalrinsanga chuan, ei leh bara intodelh loh a, ram dang mite kuta kan innghah lutuk chuan hnam ziain a ral phah thei tih sawiin, "Tih tak zeta kan beih a ṭul. Kut hnathawktute'n an tharchhuah awlsam zawka an phur chhuah theihna turin sorkarin link road a ngai pawimawh a, link road thar siam tur leh a awm sate tichangtlung turin hmalak thuai a ni ang," a ti.

Kut hnathawktute inkarah ṭanrual­na leh thawhhona ṭha a pawimawh tih sawiin Agriculture Minister chuan, "Agriculture department hnuaiah ‘Cooperative movement’ uar taka kalpui a ni ang. Mipui ei tam - alu, purûn leh dâlah kan thar chhuah hmang ngeia intodelh turin hmalak a ni dawn," a ti a; taima leh dinchhuah tum tak tak tan ṭanpuitu nih sorkarin a tum thu a sawi.

C Lalrinsanga hian Phairuangkaia Ruchi Soya Company-te'n oil palm herna khawl (mill) an bunna tur hmun a tlawh a, thawktute nen harsatna awmte an sawiho. Minister chuan, "Lunglei khawthlang lama oil palm chíngtute mamawh ber a nih avangin oil palm mill bun a nih thuai theihna atan hmalak a ni ang," a ti.