HM-in eirûk awm lohna sorkar din an tum tih hre turin sorkar hnathawkte a chah

Home minister Lalchamliana chuan nimin khan Serchhip district-a sorkar department hrang hrang hotute DC conference hall-ah a kâwm a; eirûk awm lohna sorkar din an tum tih hre reng turin a chah.

Meeting hi Serchhip additional DC Chuauhnuna'n a kaihruai a; Home Minister chuan, officer inthlahdah deuh awm ṭhin mah se, officer fel leh inpe zo em em mi tam tak a hmuh ṭhin chuan a tihlawm thu a sawi a, "Langtlang sorkar, eirukna awm lohna sorkar din kan tum a ni tih hi officer-te rilruah chám reng se ka duh a ni," a ti.

Lalchamliana chuan, minister leh MLA-te chuan mipui lamin an nawr chuan tihsak leh mai an châk ṭhin tih sawiin, "Chutiang hun a awm chângi chuan dan anga kalpui a ni em, danin a phal em, tih chung­changahte a ṭul anga inhrilh zel ni se a tha hle ang," a ti a; inpawh leh inhnaih taka hna thawhho a duh thu a sawi.

Dan lal ber ṭhin se a duh thu a sawiin Lalchámliana chuan, "Department leh department inkarah inhriatthiam lohna awm ṭhin hi tihbo theih ni se ka duh hle. Officer-te'n an hnuaia thawkte enkawl kawngah mihring mihrinna zah tak chunga enkawl ṭha ka ti. Zilh fo pawha awm ṭha duh chuang lote han hrem mai hi chu, a pawi lutuk pawhin a lang lo," a ti.

Meeting-ah hian Home Minister-in a sâwm angin department hrang hrang hotute'n an ngaimawh zual leh an district-in mamawh nia an hriatte an sawi a ni.