MG Road-a Aizawl Lei hawn a hi

Mahatma Gandhi Road, Upper Khatlaa lei tlakhniamna laia lei dawh - Aizawl Lei tia vuah chu nimin khan PWD engineer-in-chief R Vanlaltluanga'n a hawng. PWD E-in-C chuan, ruahmanna anga lei an dawh zo thei lo chu pawi a tih thu sawiin, mipui hriatthiamna a ngen.

Sorkar thuchhuah tarlan danin, lei hi arch bridge (D-Row trusses type) a ni a, permanent highway steel bridge a ni. Metre 54 (ft. 177)-a sei, ton 100 (kg. 1,00,000) dâwl zo tura ngaih niin, bridge chung lama kûl sang lai ber chu metre 9-a sang a ni a, a siam nan cheng nuai 492.32 sen a ni. January 13, 2019-ah enchhin a ni a, a nghet ṭha tawk tih finfiah a ni.

MG Road-a lei dawh hna hi February 16, 2018-ah ṭan a ni. Lei dawh ṭan lai vela PWD executive engineer (Aizawl Road South Division) David Sapzova sawi danin, a tira ruahman dan chuan, lei chu thla li chhunga dawh zawh tur niin, June 2018-ah chuan dawh zawh tawh tura ruahman a ni. Lei dawhtu contractor chu Blue Hill niin, dawh chhungin Dr R Lalthlamuana'n a enkawl a; dawh zawh tura tih hun tiam hnu tla sarihna velah hawn theih a ni ta a ni.

MG Road-a lei dawh tur avang hian dawh ṭan a nih hma deuh aṭangin lirthei reng reng tlan phal loh a ni a, he kawnga lirthei tlan tlang theih loh chhung chu kum khat dáwn a ni; lirthei lian tlan tlang theih loh hun chhung bik chu kum hnih chuang a ni thung.