KHAWTHLIR

Central YMA hnuaia Supply Reduction Service (SRS) duty-te chuan January 21, Thawhṭanni zan dar 9:30 khan Lalzidinga s/o Hmangaihzuala, Bawngkawn Hmarveng hnen aṭangin a a chenna inah heroin no. 4 can 73 an man. SRS-te chuan Lalzidinga leh a ruihhlo kawlte chu Excise & Narcotics hnenah an hlan nghal a ni.

PRISM party chuan nimin khan thuchhuah siamin, The Citizenship (Amendment) Bill, 2016 an duh lohzia lantir nan January 26-a India Republic Day lo thleng tur chu 'boycott' an tum thu an puang a; Republic Day-ah hian an party pisaah flag dum zâr an tum thu an sawi bawk. NGO Coordination Committee chuan Republic Day 'boycott' an tum thu an lo puang tawh bawk a ni.

Volunteers for Community Mental Health (VOLCOMH) leh Mukhta Foundation, Bangalore-te chuan nimin khan an hmunah hur sualna kaihhnawiha naupang khawih chingpen chungchang zirhona an buatsaih. Workshop hi LiFCo De Home leh Aftercare Home-a thawkte leh naupangte puala buatsaih a ni.

College of Veterinary Science & Animal Husbandry (CVSAH)-a professor (Livestock, Production & Management) Dr Lalnuntluangi Hmar chu tun hnai khan dean atan dah a ni. 

MG Road-a Aizawl Lei hawn a nih tak avangin Traffic SP chuan Raj Bhavan leh Sikulpuikawn inkarah lirthei tlan tlang theih a nih tâk thu a puang. Traffic SP thupek ang chuan, chhim lam hawi zawngin lirthei chi tin tlan thei a ni a, hmar lam (Raj Bhavan) lam hawi zawngin MMV/407 truck leh a aia lian tlân phal a ni lo a; leiah lirthei dah/hûn phal a ni lo.

Minister Dr K Beichhua chuan nimin khan a bial chhunga Siaha District Hospital, chief medical officer pisa, nursing school leh hospital building tharte a tlawh a, harsatna an neihte leh an mamawhte a enfiah. Dr K Beichhua hi Health & Medical Education director Dr T Lalhmangaihi'n a ṭawiawm a ni.