CAB chungchang sawi turin Oct. 5-ah Amit Shah a lo zin dawn

Aizawla Amit Shah zin tur thu leh CAB chungchang sawi a tum thu hi Assam Finance Minister leh North East Democratic Alliance (NEDA) convener Himanta Biswa Sarma chuan September 23, Thawhṭanni khan Silchar-ah a sawi niin Northeast Now chuan a tarlang.

India hmarchhaka BJP hotupa Himanta chuan, "CAB hi tihtlang ngei kan duh a, inthlan dawna kan manifesto langsar tak a ni. Chutih laiin, he bill pass a nih hma hian India hmarchhaka a dodaltu political party hrang hrangte ngaihdan kan ngaichang thiam tur a ni," a ti a, kumin November-ah CAB pass a nih a rin thu a sawi.

Himanta chuan, "CAB hi kan pass a nih pawhin, hmarchhaka mite tana pawi lo tura pass theih a nih hmel. Entirna'n, CAB hi Meghalaya huam loin, Mizorama 6th Schedule tidanglam loa pass ni ta se, eng vangin nge heng rama chengte hian an do ngawt ang? Inner Line Permit (ILP) hlih phahna tur a nih si loh chuan Parliament-a CAB pass ringawt hi an dodal ngawt lo ang," a ti.

Hetih lai hian, Mizoram sor­kara Protocol chuan Amit Shah lokal tur chungchangah sawi tur an neih loh thu Vanglaini palai zawhna chhangin an sawi a, "Official-a lehkha kan dawn loh chuan keini chuan sawi theih kan nei lo," an ti.

Vanglaini palai zawhna chhangin Mizoram BJP president Prof. JV Hluna chuan, October 5-a Amit Shah-a'n Mizoram a rawn tlawh tur thu chu an party hriattir an nih tawh thu a sawi a, "Eng nge a rawn tih dawn erawh hriattir kan la ni lo," a ti a; NEDA convener Himanta Biswa Sharma chu Amit Shah lo thlen hmain October 4-ah Mizoramah a rawn kal dawn tih a sawi.

Mizoram chief minister Zo­ram­thanga chuan September 9, 2019-a Guwahati-a India hmarchhaka NEDA hnuaia BJP thawhpuite inhmuhkhawmna, NEDA Conclave-ah Home minister Amit Shah hmaah CAB chu India hmarchhak mipuiten an duh loh thu leh, an kaltlangpui dawn a nih pawhin hmarchhak huamtir lo turin a lo ngen tawh.

NEDA inhmuhkhawmnaah hian Nagaland Chief Minister Neiphiu Rio chuan, CAB kaltlangpui a nih chuan India hmarchhaka mipui lut leh chhuak nasa taka a nghawng tur thu sawiin, kaltlangpui lo turin a ngen. Meghalaya chief minister Conrad Sangma pawhin CAB-in nghawng na tak a neih theih avangin hmarchhak mipuite tana thil hlauhawm tak a nih thu a sawi a, Home minister Amit Shah chu CAB chungchang hi hmarchhak state hruaitute sawipui hmasa turin a lo ngen tawh a ni.

Home minister Amit Shah hi National Democratic Alliance (NDA) chair person a nih bakah BJP president a ni bawk a ni.

•    CAB hi January 8, 2019-ah Lok Sabha-in an pass a, Rajya Sabha-ah pharh a ni lo.

•    BJP-in kum 2019 Lok Sabha inthlan manifesto-ah an tlin chuan CAB kalpui an tiam.

•    September 9, 2019-a NEDA Conclave-ah Mizoram, Meghalaya & Nagaland CM-te'n CAB duh loh thu an sawi.

•    CAB chungchang sawi turin October 5, 2019-ah Amit Shah chu Aizawlah a lo zin dawn.

•    NEDA convener Himanta Biswa Sarma chuan September 23 khan Aizawla Amit Shah zin tur thu Silchar-ah a puang.