Zirlai pawlte'n zirtirtu lak dan a dikah an ngai

Mizo Zirlai Pawl (MZP) chuan thuchhuah siamin, Mizoram sorkarin muster roll-a thawk tur zirtirtu 800 chuang a lak dan chu dik taka kalpui nia an hriat thu an tarlang. Mizo Students' Union (MSU) chuan, zirna chungchangah politics tuinú inrawlh lo se an duh thu an tarlang bawk.

MZP chuan, Mizoram sorkarin zirtirtu 800 chuang a la chu lawmawm an tih thu sawiin, "Sorkarin MR teacher middle school leh primary school tana zirtirtu a lak hi a dik kan ti a, Mizoram sorkar hian fair takin a la niin kan hria. School Education minister Pu Lalchhandama Ralte-in, 'A theih chin chinah a khaw mite duhsak an ni ang,' tia a sawi tawh angin, tuna zirtirtu lakah hian a khaw mi ngei 80% vel lak a niin kan hria a, thingtlang lam zirtirtu nei mumal lote'n an ṭangkaipui dawn hleah kan ngai," an ti.

MZP chuan, zirtirtu 800 chuang laknaah party politics inrawlh lo turin School Education Minister-in huai takin hma a la nia sawiin, chhuanawm an tih thu an sawi a; "Thingtlang lama zirtirtu nei mumal lo zirlaite'n zirtirtu neih hun nghakhlel takin an thlir mek a ni," tiin, tuna MR teacher lakte chu tikhawmuang lo a, appointment pe thuai turin thuneitute an ngen a ni.

MSU Gen.Hqrs. chuan, Mizoram sorkarin September 20, 2019-ah MR teacher 881 lakna result a tichhuak chu lawmawm an tih thu leh zirna siamṭha tura Mizoram sorkar hmalakna an thlàwp thu an sawi a, "Zirna hi hun rei tak party politics nen kal kawptir tawh avangin zirnain a tuar a, central services leh all India service-a Mizote kan luh tlem chhan pawh hi party politics nen kan ram zirna kan kaihkawp ṭhin vang ni-ah kan ngai. Ram leh hnam tana pawimawh ber zirnaah hian politics tuinû inrawlh lo se kan duh," an ti.

MSU chuan, Mizoram hmun tam takah zirtirtu pakhat chauh awmna sikul te, zirtirtu nei mumal lote an awm tih sawiin, "Zirlaite'n zirna ṭha an dawn theihna tur a rang lama ngaihtuahsak turin sorkar kan ngen a ni," an ti a; tun ṭuma MR teacher lak chu thianghlim leh felfai taka kalpui nia an hriat avangin, tikhawtlai lo a, zirtirtute'n an thawhna tur sikul ṭheuhah hna an thawh thuai dan ngaihtuah vat turin sorkar an ngen a ni.